Live Updates

عمران خان کو ریلیف ملنے کا کوئی امکان نہیں،واشنگٹن کو بانی پی ٹی آئی میں کوئی دلچسپی نہیں،ن لیگی سینئر وزیرکا انکشاف

بانی پی ٹی آئی عمران خان امریکی ترجیحات کی فہرست میں ہی شامل نہیں ہیں، امریکی حکام نے حالیہ رابطوں کے دوران پاکستانی ہم منصبوں سے کہا کہ بانی پی ٹی آئی کے حوالے سے سوشل میڈیا مہم کی پرواہ نہ کریں، سینئر وزیر کی گفتگو

فیصل علوی منگل 15 اپریل 2025 13:36

اسلام آباد(اردوپوائنٹ اخبار تازہ ترین۔15اپریل 2025)عمران خان کو ریلیف ملنے کا کوئی امکان نہیں، واشنگٹن کو بانی پی ٹی آئی میں کوئی دلچسپی نہیں ہے، بانی پی ٹی آئی عمران خان امریکی ترجیحات کی فہرست میں ہی شامل نہیں ہیں، امریکی حکام نے حالیہ رابطوں کے دوران پاکستانی ہم منصبوں سے کہا کہ بانی پی ٹی آئی کے حوالے سے سوشل میڈیا مہم کی پرواہ نہ کریں، سینئر وزیر نے نام نہ ظاہر کرنے پرایکسپریس نیوز کے صحافی سے گفتگو کرتے ہوئے کہا کہ امریکی حکام سے حالیہ ملاقاتوں میں امریکی حکام نے واضح کیا ہے کہ امریکی سرکاری حلقوں میں اس حوالے سے کسی تشویش کا اظہار نہیں کیا گیا ہے۔

ن لیگ کے سینئر وزیر کا یہ بھی کہنا ہے کہ امریکی حکام کیساتھ حالیہ رابطوں میں یہ واضح ہو گیا ہے کہ انہیں بانی پی ٹی آئی عمران خان میں کوئی دلچسپی نہیںہے اور نہ ہی سوشل میڈیا پر جاری مہم کی پرواہ ہے وہ پاکستان کے داخلی امور میں عدم مداخلت کے اپنے موقف پر قائم ہیں۔

(جاری ہے)

ن لیگ کے سینئر وزیر کے دوٹوک ریمارکس ن لیگ کے موڈ کے علاوہ پی ٹی آئی کی توقعات ٹھنڈی ہونے کی بھی عکاسی کرتے ہیں۔

امریکی حکام سے حالیہ ملاقاتوں سے مسلم لیگ (ن) حکومت کو یہ احساس ہو چکا ہے کہ توقعات کے برعکس بانی پی ٹی آئی کو کم ازکم فی الحال واشنگٹن سے ریلیف ملنے کا امکان نہیں ہے جبکہ پاکستان تحریک انصاف کی جانب سے افواہ سازی کا سلسلہ جاری ہے۔ 10 اپریل کو امریکی وفد کی اڈیالہ جیل میں بانی پی ٹی آئی عمران خان سے ملاقات کا بھی دعویٰ کیا گیا جسے ن لیگی سینیٹر عرفان صدیقی نے افواہ قرار دیکر مسترد کر دیا۔

دوسری جانب پاکستان تحریک انصاف کی مقتدرہ حلقوں سے بات چیت شروع کرنے کی کوششوں میں بھی خاص پیش رفت نہیں ہوئی ہے اس کے باوجود سوشل میڈیا پر بانی پی ٹی آئی کی جلد رہائی یا بڑی سیاسی تبدیلی کی پیش گوئیوں کا سلسلہ جاری ہے۔ بانی پی ٹی آئی عمران خان کے حامی اس امید پر کئی ماہ سے سوشل میڈیا پر یہ تاثر دیتے رہے ہیں کہ امریکی انتظامیہ کی تبدیلی کے بعد وائٹ ہاوس سے ایک کال ان کے لیڈرکی قسمت بدل دے گی۔