سکیورٹی اہلکاروں کی جانب سے مبینہ طور پر انسانی لاشوں کے بدلے بھتہ وصول کرنے کا اسکینڈل سامنے آ گیا

بدھ 16 اپریل 2025 18:13

پشاور (اُردو پوائنٹ اخبارتازہ ترین - اے پی پی۔ 16 اپریل2025ء) حیات آباد میڈیکل کمپلیکس پشاور میں سکیورٹی اہلکاروں کی جانب سے مبینہ طور پر انسانی لاشوں کے بدلے بھتہ وصول کرنے کا ہولناک اسکینڈل سامنے آ گیا ہے۔ انکشافات کے مطابق اسپتال کے پرائیویٹ سکیورٹی اہلکار انسانی لاشوں کی غیر قانونی تجارت میں ملوث پائے گئے ہیں، جن کی ویڈیو سوشل میڈیا پر وائرل ہونے کے بعد معاملہ منظر عام پر آیا۔

ویڈیو میں ایک سکیورٹی اہلکار کو ایک ایمبولینس ڈرائیور سے پانچ ہزار روپے بھتہ طلب کرتے ہوئے سنا جا سکتا ہےاہلکار کہتا ہے کہ میں نے لاش پہلے ہی فراہم کر دی ہے، اب تمہیں پانچ ہزار روپے دینے ہوں گے۔اس ویڈیو کے وائرل ہونے کے بعد اسپتال انتظامیہ نے فوری کارروائی کرتے ہوئے مذکورہ سکیورٹی گارڈ ممتاز محمد ولد باز آفریدی کو معطل کر دیا ہے۔

(جاری ہے)

ان پر الزام ہے کہ وہ اسپتال کی حدود میں سول ایمبولینس ڈرائیورز سے غیر قانونی طور پر کمیشن یا رشوت وصول کر رہے تھے۔نوٹیفکیشن کے مطابق مذکورہ اہلکار کو فوری طور پر معطل کر کے انکوائری کمیٹی بنانے کی سفارش کی گئی ہے تاکہ مکمل تحقیقات کے بعد مزید کارروائی عمل میں لائی جا سکےاسپتال انتظامیہ کا کہنا ہے کہ واقعے کی مکمل چھان بین کی جائے گی اور قصورواروں کے خلاف سخت کارروائی عمل میں لائی جائے گی۔ ترجمان کے مطابق کسی بھی قسم کی بدعنوانی اور غیر قانونی سرگرمی کو ہرگز برداشت نہیں کیا جائے گا۔