شہداء اور غازی ہماری قوم کا فخر ہیں، ان کا احترام اور عزت ہر پاکستانی پر فرض ہے، آرمی چیف

ہماری آج کی امن و آزادی انہی بہادر سپوتوں کی قربانیوں کی مرہونِ منت ہے،جنرل ہیڈ کوارٹرمیں پاک فوج کے افسران و جوانوں کو جرات ،شجاعت اور قوم کی خدمت پر عسکری اعزازات سے نوازنے کی تقریب کا انعقاد، جنرل سید عاصم منیر کا تقریب سے خطاب

فیصل علوی جمعرات 17 اپریل 2025 10:44

شہداء اور غازی ہماری قوم کا فخر ہیں، ان کا احترام اور عزت ہر پاکستانی ..

راولپنڈی(اردوپوائنٹ اخبار تازہ ترین۔17اپریل 2025)آرمی چیف جنرل سید عاصم منیر کا کہنا ہے کہ شہداء اور غازی ہماری قوم کا فخر ہیں، ان کا احترام اور عزت ہر پاکستانی پر فرض ہے،ہماری آج کی امن و آزادی انہی بہادر سپوتوں کی قربانیوں کی مرہونِ منت ہے،جنرل ہیڈ کوارٹر (جی ایچ کیو) راولپنڈی میں ایک پروقار اعزازی تقریب منعقد ہوئی جس میں چیف آف آرمی سٹاف جنرل سید عاصم منیر نے پاک فوج کے افسران اور جوانوں کو جرات، شجاعت اور قوم کی بے مثال خدمت پر عسکری اعزازات سے نوازا۔

پاک فوج کے شعبہ تعلقات عامہ (آئی ایس پی آر) کاکہنا ہے کہ تقریب میں سینئر فوجی افسران کے علاوہ شہداءاور اعزاز یافتہ جوانوں کے اہل خانہ کی بڑی تعداد نے شرکت کی۔تقریب میں ستارہ امتیاز (ملٹری) اور تمغہ بسالت سمیت مختلف اعزازات دئیے گئے۔

(جاری ہے)

شہداءکو دئیے گئے اعزازات ان کے اہل خانہ نے اعزاز اور فخر کے ساتھ وصول کئے۔اس موقع پر تقریب سے خطاب کرتے ہوئے آرمی چیف جنرل سید عاصم منیر نے شہداءکو زبردست خراج عقیدت پیش کیا۔

انہوں نے کہا کہ یہ تقریب نہ صرف اعزاز یافتگان کیلئے ایک لمحہ فخر تھی بلکہ پوری قوم کیلئے ایک پیغام تھی کہ پاکستان کی سلامتی، خودمختاری اور امن کیلئے ہماری افواج ہر دم تیار ہیں۔آرمی چیف نے پاک فوج کے عزم، پیشہ ورانہ مہارت اور قربانیوں کو خراج تحسین پیش کیا اور کہا کہ قوم کو ان پر فخر ہے۔ان کا کہنا تھا کہ شہداءکی عزت اور احترام ہر پاکستانی کیلئے ایک مقدس امانت ہے۔

آرمی چیف جنرل سید عاصم منیر نے شہداءکے اہل خانہ کی قربانیوں کو سراہتے ہوئے ان کے حوصلے، صبر اور ثابت قدمی کی تعریف کی اور کہا کہ قوم ان عظیم خاندانوں کی مقروض ہے۔آرمی چیف نے پاک فوج کے عزم، پیشہ ورانہ مہارت اور قربانیوں کو خراج تحسین پیش کیا اور کہا کہ قوم کو ان پر فخر ہے۔آرمی چیف نے تقریب سے خطاب کرتے ہوئے مزید کہا کہ پاک فوج اور قانون نافذ کرنے والے اداروں کی دہشت گردی کے خلاف مسلسل جدوجہد کو سراہتے ہوئے کہا کہ ہمارے سپاہیوں نے کئی دہشت گرد حملے ناکام بنائے اور اہم دہشت گرد کمانڈروں کو ٹھکانے لگایا۔