ڈیرہ اسماعیل خان ، ایس ایچ او کی گاڑی پر فائرنگ ، ہیڈ کانسٹیبل سمیت 2 افراد جاں بحق

اہلکار عدالت میں گواہی کیلئے نجی گاڑی میں ڈی آئی خان آ رہے تھے، حملے میں ایس ایچ او محفوظ رہے، واقعہ کی اطلاع ملتے ہی پولیس کی بھاری نفری موقع پر پہنچ گئی ، ریسکیو اہلکاروں نے لاشوں کو ہسپتال منتقل کر دیا

فیصل علوی جمعہ 18 اپریل 2025 12:05

ڈیرہ اسماعیل خان ، ایس ایچ او کی گاڑی پر فائرنگ ، ہیڈ کانسٹیبل سمیت ..

ڈیرہ اسماعیل خان(اردوپوائنٹ اخبار تازہ ترین۔18اپریل 2025)خیبرپختونخواہ کے علاقے ڈیرہ اسماعیل خان میں نامعلوم افراد کی فائرنگ سے ہیڈ کانسٹیبل سمیت 2 افراد جاں بحق ہوگئے، حملے میں ایس ایچ او محفوظ رہے،واقعہ کی اطلاع ملتے ہی پولیس کی بھاری نفری موقع پر پہنچ گئی ،ریسکیو اہلکاروں نے لاشوں کو ہسپتال منتقل کر دیا گیا،بتایا گیا ہے کہ ڈیرہ اسماعیل خان کے علاقے موسیٰ زئی کے قریب ایس ایچ او تھانہ چودہوان قاسم خان کی گاڑی پر فائرنگ کی گئی ہے، گولیاں لگنے سے ہیڈ کانسٹیبل جاوید عالم سمیت 2 افراد جاں بحق ہو گئے۔

پولیس کا کہنا ہے کہ اہلکار عدالت میں گواہی کیلئے نجی گاڑی میں ڈی آئی خان آ رہے تھے کہ نامعلوم افراد نے گاڑی پر فائرنگ کر دی۔ملزمان فائرنگ کرنے کے بعد فرا ر ہونے میں کامیاب ہوگئے ۔

(جاری ہے)

واقعہ کی اطلاع ملتے ہی پولیس کی بھاری نفری موقع پر پہنچ گئی اور ملزمان کی تلاش کیلئے علاقے میں سرچ آپریشن شروع کردیا گیا۔خیال رہے کہ چند روز قبل بھی نوشہرہ میں موٹر وے پر نامعلوم افراد کی فائرنگ سے مردان کے سینئر سول جج ایڈمن سمیت وکیل جاں بحق ہوگیاتھا۔

ملزمان قتل کرنے کے بعد موقع سے فرار ہوگئے تھے۔دونوں مقتولین کی لاشیں رشکئی سے نوشہرہ میڈیکل کمپلیکس منتقل کر دی گئیں تھیں۔بتایا گیا تھا کہ پولیس کا کہنا تھا کہ نوشہرہ میں رشکئی انٹرچینج کے قریب گاڑی پر فائرنگ سے سول جج ایڈمن مردان حیات اور خالد خان ایڈوکیٹ جاں بحق ہوگئے تھے۔ دونوں آپس میں رشتے دار تھے۔نوشہرہ پولیس کے مطابق مقتول خالد خان ایڈووکیٹ جاں بحق ہونے والے سول جج حیات کے بہنوئی تھے۔

پولیس کا کہنا تھا کہ فائرنگ کا واقعہ مبینہ طور پر جائیداد کے تنازع کے باعث پیش آیا تھا۔ ریسکیو 1122 نے بتایا تھا کہ مقتولین کی لاشیں رشکئی سے نوشہرہ میڈیکل کمپلیکس منتقل کر دی گئیں تھیں۔آئی جی خیبر پختونخوا ہ ذوالفقار حمید نے موٹروے پر سینیئر سول جج حیات خان، وکیل خالد خان اور سابق ضلعی ناظم کوہاٹ اور ڈی آئی جی ملک سعد شہید کے بھائی ملک اسد پر قاتلانہ حملوں کا نوٹس لے لیا تھا۔

دوسری جانب خیبرپختونخوا ہ بار کونسل نے بھی سینئرسول جج اوروکیل کے قتل کی مذمت کی تھی۔ خیبرپختونخوا ہ بارکونسل کی کال پر وکلا کے عدالتی بائیکاٹ کے باعث سائلین کو مشکلات کا سامنا تھا۔ خیبرپختونخواہ بار کونسل نے مطالبہ کیا ہے کہ سینئرسول جج محمدحیات اور ایڈووکیٹ خالدخان کے قاتلوں کو گرفتار کیا جائے۔