اسرائیل نے جنگ بندی معاہدے کی پابندی نہیں کی، امیر قطر

حل صرف اقوام متحدہ کی قراردادوں کی بنیاد پر اور دو ریاستی حل سے مشروط ہے،روسی صدرسے ملاقات

جمعہ 18 اپریل 2025 13:39

ماسکو(اُردو پوائنٹ اخبارتازہ ترین - این این آئی۔ 18 اپریل2025ء)قطر کے امیر شیخ تمیم بن حمد الثانی نے کہا کہ اسرائیل نے غزہ میں جنوری میں ہونے والے جنگ بندی کے معاہدے کا احترام نہیں کیا۔ میڈیارپورٹس کے مطابق قطری امیر ماسکو میں روسی صدر ولادیمیر پوتن سے ملاقات کی۔

(جاری ہے)

قطر کے حکمران، جو اس معاہدے کے اہم ثالث تھے، نے کہا کہ جیسا کہ آپ جانتے ہیں، ہم نے کچھ ماہ قبل ایک معاہدہ کیا تھا، لیکن بدقسمتی سے اسرائیل نے اس معاہدے کی پاسداری نہیں کی۔

شیخ تمیم نے کہا کہ قطر مختلف نقطہ نظر کو قریب لانے کی کوشش کرے گا تاکہ ایک ایسا معاہدہ ہو سکے جو فلسطینی عوام، خاص طور پر غزہ کے عوام کی تکالیف کا خاتمہ کرے۔روسی صدر نے فلسطین، اسرائیل تنازع کے حل کے لیے قطر کی سنجیدہ کوششوں کو سراہا اور اس تنازع میں ہونے والی ہلاکتوں کو ایک المیہ قرار دیا۔انہوں نے مزید کہا کہ ایک طویل المدتی حل صرف اقوام متحدہ کی قراردادوں کی بنیاد پر اور دو ریاستی حل سے مشروط ہے۔