یونیورسٹی ٹاؤن ہاؤسنگ سکیم کا ہیڈ آفس سیل کر دیا گیا

جمعہ 18 اپریل 2025 21:00

راولپنڈی (اُردو پوائنٹ اخبارتازہ ترین - اے پی پی۔ 18 اپریل2025ء) ڈائریکٹر جنرل راولپنڈی ڈویلپمنٹ اتھارٹی کنزہ مرتضیٰ کی ہدایات پر عمل کرتے ہوئے آرڈی اے انفورسمنٹ اسکواڈ نے اسلام آباد کیپیٹل ٹیریٹری (آئی سی ٹی) انتظامیہ کے اشتراک سے G-11 مرکز میں واقع یونیورسٹی ٹاؤن ہاؤسنگ سکیم کے ہیڈ آفس کو سیل کر دیا ہے۔ آر ڈی اے کے ترجمان کے مطابق یہ کارروائی پنجاب ڈویلپمنٹ اتھارٹیز پرائیویٹ ہاؤسنگ سکیم رولز 2021 ءکی متعدد خلاف ورزیوں کو مدنظر رکھتے ہوئے کی گئی، جن میں غیر قانونی پلاٹوں کی فروخت، غیر قانونی ترقیاتی سرگرمیاں، فراڈ پر مبنی مارکیٹنگ اور متعدد عوامی شکایات شامل ہیں جو مختلف فورمز جیسے پی ایم پورٹل، محتسب پنجاب اور سی ایم پورٹل وغیرہ پر موصول ہوئیں۔

ڈائریکٹر جنرل آرڈی اے کنزہ مرتضیٰ نے کہا کہ آر ڈی اے اس بات کو یقینی بنانے کے لیے پرعزم ہے کہ تمام ہاؤسنگ سکیمیں قوانین کی مکمل پاسداری کریں تاکہ عوام کے مفادات کا تحفظ ہو اور شہر کا ترقیاتی معیار برقرار رہے۔

(جاری ہے)

ڈی جی آر ڈی اے نے کہا کہ ہم ایسی کسی بھی خلاف ورزی کو برداشت نہیں کریں گے جو شہری ترقی کی سالمیت یا عوام کی فلاح و بہبود کو متاثر کرے۔ آر ڈی اے کا انفورسمنٹ اسکواڈ علاقے میں ہاؤسنگ سکیموں کی مسلسل نگرانی جاری رکھے گا اور مستقبل میں بھی کسی بھی غیر قانونی سرگرمی کی صورت میں مزید قانونی کارروائیاں عمل میں لائی جائیں گی۔

Facebook Twitter Google + Share on Whatsapp

یونیورسٹی ٹاؤن ہاؤسنگ سکیم کا ہیڈ آفس سیل کر دیا گیا

متعلقہ عنوان :

مزید تعلیم کی خبریں