مقبوضہ جموںوکشمیر میں طوفانی بارشیں ، ژالہ باری سے پھل ، فصلیں تباہ ،راجوری میں 100سے زائد گھروں کو نقصان پہنچا

ہفتہ 19 اپریل 2025 14:14

سرینگر(اُردو پوائنٹ اخبارتازہ ترین - این این آئی۔ 19 اپریل2025ء)بھارت کے غیر قانونی زیر قبضہ جموںوکشمیر میں طوفانی بارشوں نے تباہی مچا دی ہے، ژالہ باری کیوجہ سے پھل اور فصلیں سخت متاثر ہوئی ہیں۔کشمیر میڈیاسروس کے مطابق گرمائی دارلحکومت سرینگر سمیت وادی کے مختلف علاقوں میں گزشتہ روز سخت بارش ہوئی۔ ضلع شوپیاں کے کئی علاقوں میں ژالہ باری کے باعث پھلوں کے باغات کو بڑے پیمانے پر نقصان پہنچا ہے۔

محکمہ موسمیات نے 18 اپریل سے 20 اپریل تک مقبوضہ علاقے میں شدید بارش، برف باری، گرج چمک اور تیز ہواؤں کی وارننگ جاری کی ہے۔ طوفانی ہوائوں ،ژالہ باری اور موسلا دھار بارش نے راجوری ضلع کے کالاکوٹ علاقے میں تباہی مچا دی، جہاں 100 سے زیادہ گھر وں کو نقصان پہنچا ہے اور متعدد سکولوںکی چھتیں اڑ گئی ہیں۔

(جاری ہے)

محکمے نے جموں وکشمیر کے بالائی علاقوں میں پیر پنجال رینج خاص طور پر اسلام آباد-پہلگام، کولگام، سنتھن پاس، شوپیاں، پیر کی گلی، سونمرگ ،زوجیلا، بانڈی پورہ،رازدان پاس، گلمرگ اور کپواڑہ سادھنا پاس کے حوالے سے خاص طورپر الرٹ جاری کیا ہے۔

ایڈوائزری میں 40-50 کلومیٹر فی گھنٹہ کی رفتار سے چلنے والی تیز ہواؤں، 60-70 کلومیٹر فی گھنٹہ کی رفتار سے ڑالہ باری اور آسمانی بجلی گرنے کے امکان ظاہر کیا گیا ہے۔ لینڈ سلائیڈنگ، مٹی کے تودے گرنے، پتھروں کی شوٹنگ اور ندیوں اور ندیوں میں پانی کی سطح میں اضافے کے بارے میں بھی خبردار کیا گیا ہے۔ نشیبی علاقوں میں پانی جمع ہونے کا بھی خدشہ ہے۔ کسانوں کو 18 اپریل سے 21 اپریل کی سہ پہر تک تمام زرعی کاموں کو معطل کرنے کا مشورہ دیا گیا ہے۔