شریف برادران کی کینال منصوبے پر پیپلزپارٹی کے تحفظات دور کرنے کی ہدایت

1991میں طے پانے والے معاہدے ، 1992کے ارسا ایکٹ کی موجودگی میں ناانصافی نہیں ہو سکتی،راناثناء اللہ

ہفتہ 19 اپریل 2025 22:35

اسلام آباد(اُردو پوائنٹ اخبارتازہ ترین - این این آئی۔ 19 اپریل2025ء)وزیراعظم کے مشیر رانا ثناء اللہ نے کہا ہے کہ وزیراعظم شہباز شریف اور مسلم لیگ (ن)کے صدر نواز شریف نے پیپلز پارٹی کے ساتھ بات چیت کے ذریعے مسائل حل کرنے کی ہدایت کی ہے۔میڈیارپورٹ کے مطابق رانا ثناء اللہ کی جانب سے جاری بیان میں کہا گیا کہ مسلم لیگ (ن)پانی سمیت تمام وسائل کی منصفانہ تقسیم پر مکمل یقین رکھتی ہے، 1991میں صوبوں کے درمیان طے پانے والے معاہدے اور 1992کے ارسا ایکٹ کی موجودگی میں کسی سے ناانصافی نہیں ہو سکتی۔

انہوںنے کہاکہ وزیراعظم اور صدرمسلم لیگ (ن)نے پیپلز پارٹی کے ساتھ بات چیت کے ذریعے مسائل حل کرنے کی ہدایت کی ہے، بات چیت اور مشاورت ہی ہر مسئلے کا حل ہے۔رانا ثناء اللہ نے پیپلز پارٹی کو ذمہ داری کے ساتھ بات کرنے کا مشورہ دیتے ہوئے کہا کہ پیپلز پارٹی وفاق کا حصہ ہے اور ہم ان کی قیادت کا بہت احترام کرتے ہیں، آئینی عہدوں پر رہتے ہوئے بات زیادہ ذمہ داری سے کرنی چاہیے۔

(جاری ہے)

انہوں نے کہا کہ کسی صوبے کا پانی دوسرے صوبے کے حصے میں نہیں جاسکتا، اس امر کو یقینی بنانے کیلئے ملک میں آئینی طریقہ کار اور قوانین موجود ہیں جبکہ پانی کے مسئلے پر سیاست نہیں کرنی چاہیے، معاملات میز پر بیٹھ کر حل کرنے چاہئیں۔انہوںنے کہاکہ اکائیوں کی مضبوطی کو وفاق کی مضبوطی سمجھتے ہیں، ماضی کی طرح اسی طرز عمل پر چلتے رہیں گے، آئین و جمہوریت پر پختہ یقین رکھنے والی جماعت کے طور پر اکائیوں اور اس میں رہنے والے عوام کے حقوق کے تحفظ پر سمجھوتہ کیا نہ کریں گے۔