ہزاروں پاکستانیوں کے حج سے محروم رہنے کا خدشہ، 36 ارب روپے بھی پھنس گئے

اتوار 20 اپریل 2025 15:25

کراچی(اُردو پوائنٹ اخبارتازہ ترین - این این آئی۔ 20 اپریل2025ء) رواں سال 67 ہزار پاکستانیوں کے حج سے محروم رہ جانے کا خدشہ پیدا ہو گیا ہے، نجی ٹور آپریٹرز کے حج کے لیے جمع 36 ارب روپے بھی پھنس گئے ہیں۔ذرائع نے بتایا کہ ملک میں حکومت کی جانب سے جج پالیسی کی تاخیر سے منظوری دیے جانے کے باعث درخواستیں بروقت جمع نہیں ہو سکیں، جس کی وجہ سے وقت کم ملا اور انتظامات نہ ہو سکے جب کہ رقم سعودی عرب چلی گئی۔

(جاری ہے)

ذرائع کے مطابق سعودی حکومت سے بروقت رابطے اور انتظامات نہ کیے جانے کی وجہ سے یہ مسائل پیدا ہوئے ہیں، ادھر سعودی حکومت نے بھی رقم واپس کرنے کی بجائے آئندہ سال ایڈجسٹ کرنے کا کہہ دیا ہے۔وزارت مذہبی امور کے مطابق بعض کمپنیوں نے حکم امتناع حاصل کر کے کوٹے کو روک دیا تھا، رواں سال پرائیویٹ حج اسکیم سے 23 ہزار 620 عازمین جا سکیں گے، جب کہ نجی حج کوٹے پر ہر سال تقریبا 90 ہزار پاکستانی فریضہ حج ادا کرتے ہیں۔