معاون خصوصی برائے صنعت عبدالکریم تورڈھیر کی چیئرمین پیسکو سے ملاقات، بجلی کے مسائل بارے تبادلہ خیال

پشاور (اُردو پوائنٹ اخبارتازہ ترین - اے پی پی۔ 20 اپریل2025ء) وزیراعلیٰ خیبر پختونخوا کے معاون خصوصی برائے صنعت عبدالکریم تورڈھیر نے پشاور میں چیئرمین پیسکو حمایت اللہ،چیف پیسکو اور انکی ٹیم سے ملاقات کی اور ان سے صوبے میں اکنامک زونز اور چھوٹی صنعتی بستیوں میں بجلی کے مسائل سے متعلق تبادلہ خیال کیا۔ ملاقات میں خیبرپختونخوا اکنامک زونز ڈویلپمنٹ اینڈ مینجمنٹ کمپنی اور سمال انڈسٹریز ڈویلپمنٹ بورڈ کے متعلقہ افسران بھی شریک تھے۔

ملاقات کے دوران صنعتی بستیوں اور زونز میں بجلی کے حل طلب مسائل کو مرحلہ وار چیئرمین پیسکو کے ساتھ اٹھایاگیا جن کو حل کرنے کی یقین دہانی کرائی گئی۔ بنوں اکنامک زون کی عرصہ دراز سے زیر التوا مسئلے کے حوالے سے بتایا گیا کہ دوبارہ اختصاص کے بعد زون کے 11 کے وی داخلہ ڈسٹریبیوشن لائن کیلئے ورک آرڈر جلد جاری کیا جائے گا۔

(جاری ہے)

اس کے علاوہ بنوں اکنامک زون کیلئے 132 کے وی گرڈ اسٹیشن کے ٹرانسمشن لائن کا سروے بھی آئندہ ہفتے کیا جائے گا جبکہ انڈسٹریل پارک بنوں میں گرڈ اسٹیشن کے قیام کیلئے موزوں مقام کی نشاندہی کیلئے جائنٹ سروے بھی عنقریب کیا جائے گا۔

ایکسپورٹ پروسیسنگ زون نوشہرہ کے حوالے سے پیسکو حکام نے یقین دہانی کرائی کہ 11 کے وی فیڈر آئندہ ہفتے انرجائز کیا جائے گا جبکہ نوشہرہ اکنامک زون کے 11 کے وی توسیعی فیڈر کو بھی آئندہ ہفتے انرجائز کیا جائے گا۔اجلاس میں نئی صنعتی زونز بونیر ماربل سٹی،کاٹلنگ اکنامک زون،سالٹ اینڈ جپسم سٹی کرک،دربند اور رشکئی سپیشل اکنامک زون کے بجلی کے امور بھی زیر بحث لائے گئے۔

کے پی ایزڈمک کی طرف سے بتایا گیا کہ مستقبل کے ان منصوبوں میں بجلی کے ضروریات کو پورا کرنے کی ضرورت ہے۔ ملاقات میں ایس آئی ڈی بی کے منصوبوں کے حوالے سے بھی چیئرمین پیسکو سے تبادلہ خیال کیا گیا جس کے سلسلے میں انہوں نے سمال انڈسٹریل اسٹیٹ مردان 3 کے ڈبل سرکٹ کے مسئلے کو حل کرنے کا یقین دلایا اور کہا کہ اس کو جلد از جلد انرجائز کیا جائے گا جس سے بستی میں بجلی کی ٹرپنگ کا مسئلہ حل ہوگا۔

اس طرح کلابٹ سمال انڈسٹریل اسٹیٹ میں بجلی تاریں بچھانے کا کام جلد مکمل کرنے اور گرڈ پینل کیلئے ڈیمانڈ نوٹس کے امور جلد نمٹانے کی ہدایت کی گئی۔مزید برآں درگئی سمال انڈسٹریل اسٹیٹ کیلئے علیحدہ11 کے وی فیڈر کیلئے ڈیمانڈ نوٹس کی فراہمی اور جائنٹ سروے کو 10 یوم میں یقینی بنانے کی بھی ہدایت کی گئی۔چیئرمین پیسکو کے مطابق سمال انڈسٹریل اسٹیٹ پشاور کیلئے علیحدہ 11 کے وی فیڈر رحمان بابا گرڈ اسٹیشن سے کوہاٹ روڈ گرڈ اسٹیشن کو شفٹ کیا جائے گا جس سے ٹرپنگ اور وقتاً فوقتاً پرمٹ کی وجہ سے شارٹ فال کا مسئلہ حل ہو جائے گا۔

انڈسٹریل پارک پشاور کے حوالے سے انہوں نے معاون خصوصی کو آگاہ کرتے ہوئے بتایا کہ اس بستی کیلئے سروے اور تین الگ الیکٹرک ڈبل سرکٹ کیلئے ڈیمانڈ نوٹسز کی فراہمی آئندہ ہفتے میں کی جائے گی۔اس طرح سمال انڈسٹریل اسٹیٹ بنوں میں بجلی سے متعلق پیش کردہ مسائل کو ڈیمانڈ نوٹس کی فراہمی کے بعد 10 ایام میں حل کیا جائے گا۔ ملاقات میں معاون خصوصی نے چیئرمین پیسکو کا صوبے میں صنعتی شعبے کے مسائل حل کرنے کیلئے اٹھائے گئے اقدامات پر شکریہ ادا کیا۔

اس موقع پر چیئرمین پیسکو نے صنعتی شعبے کیلئے ہمہ وقت فعال رہنے پر معاون خصوصی کی کوششوں کو سراہتے ہوئے کہا کہ انکی ماہرانہ صلاحیتوں کے بل بوتے پر باوجود کئی چیلنجز کے صوبے میں صنعتی ترقی کا سفر جاری ہے۔ انہوں نے کہا کہ بجلی کے امور کے حوالے سے صنعتی صارفین ہماری پہلی ترجیح ہے اور ان کے مسائل کو حل کیا جائے گا۔