یو اے ای کے وزیر خارجہ اسلام آباد پہنچ گئے،نائب وزیراعظم اسحاق ڈار و دیگر حکام نے استقبال کیا

یہ اعلیٰ سطحی دورہ پاکستان اور متحدہ عرب امارات کے درمیان گہرے، برادرانہ تعلقات کی عکاسی کرتا ہے ،دفترخارجہ

اتوار 20 اپریل 2025 22:20

اسلا م آباد(اُردو پوائنٹ اخبارتازہ ترین - این این آئی۔ 20 اپریل2025ء)متحدہ عرب امارات کے وزیرخارجہ شیخ شیخ عبداللہ بن زاید النہیان اعلی سطح کے وفد کے ہمراہ پاکستان پہنچ گئے۔امارات کے وزیرمملکت برائے امور خارجہ ہمراہ کے ساتھ اعلیٰ سطح کا وفد بھی پاکستان پہنچا ہے، ایئرپورٹ پر نائب وزیراعظم و وزیرخارجہ اسحق ڈار اور دیگر حکام نے استقبال کیا۔

ترجمان دفتر خارجہ کے مطاب یہ اعلیٰ سطحی دورہ پاکستان اور متحدہ عرب امارات کے درمیان گہرے، برادرانہ تعلقات کی عکاسی کرتا ہے اور باہمی دلچسپی کے تمام شعبوں میں دوطرفہ تعاون کو مضبوط بنانے کیلیے دونوں ممالک کے مشترکہ عزم کو اجاگر کرتا ہے۔اپنے دورے کے دوران شیخ عبداللہ بن زید النہیان پاکستان کے نائب وزیراعظم ، وزیر خارجہ سے بات چیت کریں گے۔

(جاری ہے)

ملاقات کے دوران دوطرفہ تعلقات کے تمام پہلوؤں کا جائزہ لیا جائے گا جس میں تجارت اور سرمایہ کاری، توانائی تعاون، علاقائی سلامتی اور عوام سے عوام کے روابط پر خصوصی توجہ دی جائے گی۔یہ دورہ دونوں فریقین کو باہمی دلچسپی اور تشویش کی علاقائی اور عالمی پیش رفت پر تبادلہ خیال کرنے کا موقع بھی فراہم کرے گا۔نائب وزرائے اعظم کی آخری ملاقات 21فروری 2025کو ابوظہبی میں ہوئی تھی۔

شیخ عبداللہ وزیر اعظم پاکستان جناب محمد شہباز شریف سے بھی ملاقات کریں گے۔ یہ کال خطے میں امن اور خوشحالی کے مشترکہ وژن کی توثیق کرے گی۔شیخ عبداللہ بن زاید النہیان کا دورہ پاکستان اور متحدہ عرب امارات کے دیرینہ تعلقات کو مزید مستحکم کرے گا اور مختلف شعبوں میں دوطرفہ تعلقات کو مزید گہرا کرنے میں مدد دے گا جس سے دونوں ممالک کے عوام کو فائدہ پہنچے گا۔