انٹرمیڈیٹ فرسٹ اینول 2025 امتحانات 29 اپریل سے شروع ہوں گے

راولپنڈی (اُردو پوائنٹ اخبارتازہ ترین - اے پی پی۔ 21 اپریل2025ء) بورڈ آف انٹرمیڈیٹ اینڈ سیکنڈری ایجوکیشن راولپنڈی کے زیر اہتمام انٹرمیڈیٹ فرسٹ اینول 2025 امتحانات کا آغاز 29 اپریل بروز منگل سے ہو گا، تمام تر انتظامات مکمل کر لیے گئے ہیں۔پیر کو چیئرمین تعلیمی بورڈ محمد عدنان خان اور کنٹرولر امتحانات تنویر اصغر اعوان نے مشترکہ اعلامیہ میں بتایا کہ اس سال 59550 امیدواران امتحانات میں شرکت کر رہے ہیں۔

امتحانات کے انعقاد کو شفاف اور منظم بنانے کے لیے جدید ٹیکنالوجی کا مؤثر استعمال کیا جا رہا ہے، ریگولر امیدواروں کی رول نمبر سلپس ان کے متعلقہ تعلیمی اداروں کے پورٹلز پر اپلوڈ کر دی گئی ہیں جبکہ پرائیویٹ امیدواروں کو ان کی رول نمبر سلپس ان کے داخلہ فارم پر دیے گئے پتہ جات پر ارسال کر دی گئی ہیں۔

(جاری ہے)

مزید سہولت کے لیے، پرائیویٹ امیدوار اپنا ''بے فارم'' یا ''آن لائن داخلہ فارم'' بورڈ کی ویب سائٹwww.biserawalpindi.edu.pkپر انٹر کر کے اپنی رول نمبر سلپ ڈاؤن لوڈ بھی کر سکتے ہیں ۔

امتحانی مراکز پر نگرانی کے نظام کو مؤثر بنانے کے لیے جدید ڈیجیٹل ٹولز، سی سی ٹی وی کیمرے اور آن لائن مانیٹرنگ سسٹم متعارف کرایا گیا ہے۔ روزانہ کی بنیاد پر مانیٹرنگ ٹیمیں تمام امتحانی مراکز کا معائنہ کریں گی۔ اس کے ساتھ ساتھ ضلعی انتظامیہ اور اسپیشل برانچ بھی بھرپور معاونت فراہم کر رہی ہیں جو اپنی رپورٹیں براہ راست بورڈ آفس کو ارسال کریں گی۔

چیئرمین اور کنٹرولر امتحانات نے کہا کہ حکومت پنجاب کی زیرو ٹالرنس پالیسی پر مکمل عملدرآمد کو یقینی بنایا جائے گا اور بوٹی مافیا کے خلاف سخت کارروائی عمل میں لائی جائے گی۔امتحانی عملے کی مکمل فہرستیں اسپیشل برانچ کو ارسال کر دی گئی ہیں تاکہ امتحانی ڈیوٹی دینے والوں کی مکمل چھان بین کی جا سکے۔ بورڈ نے امتحانات کی شفافیت اور سیکیورٹی کے لیے جدید ڈیجیٹل ویری فیکیشن سسٹمز بھی استعمال کیے ہیں۔

رول نمبر سلپس یا امتحانات سے متعلق کسی بھی قسم کی معلومات یا مسائل کی صورت میں امیدوار کنٹرولر امتحانات کے دفاتر کے نمبرز 0515450917، -5450918 051 یا اسسٹنٹ کنٹرولر انٹر برانچ رانا الیاس سے -5450920 051یا موبائل نمبر -5464775 0333پر رابطہ کریں۔ مزید رہنمائی کے لیے بورڈ کی آفیشل ویب سائٹwww.biserawalpindi.edu.pk وزٹ کریں۔