شارجہ، پاکستانی قونصل جنرل حسین محمد نے پاکستانی مسیحی کمیونٹی کے ساتھ ایسٹر کی خوشیاں منائیں

پیر 21 اپریل 2025 21:40

دبئی (اُردو پوائنٹ اخبارتازہ ترین - این این آئی۔ 21 اپریل2025ء)شارجہ میں پاکستانی مسیحی برادری نے ایسٹر کے حوالے سے خصوصی تقریب کا انعقاد کیا۔ دبئی میں پاکستانی قونصل جنرل حسین محمد نے شارجہ کے مقامی ہوٹل میں منعقدہ ایسٹر کی خصوصی تقریب میں پاکستانی مسیحی کمیونٹی کے ساتھ بحیثیت مہمان خصوصی شرکت کی اور کمیونٹی کے اراکین کو ایسٹر کی مبارکباد دی۔

دبئی میں پاکستانی کونسل خانہ سے جاری بیان کے مطابق قونصل جنرل نے اپنے خطاب میں پاکستانی مسیحی کمیونٹی کی تعلیم، صحت کی دیکھ بھال اور دیگر اہم شعبوں میں بے شمار خدمات کو سراہا۔ انہوں نے زور دیتے ہوئے کہا کہ متحدہ عرب امارات میں تمام پاکستانی، چاہے وہ کسی بھی مذہب کے ہوں، اپنے وطن کے اتحاد اور تنوع کی نمائندگی کرتے ہیں۔

(جاری ہے)

قونصل جنرل حسین محمد نے کہاکہ آپ ہمارے سفیر ہیں، پاکستان کی نمائندگی کرتے ہیں اور آپ کی کامیابیاں ہمارے وطن کے لیے فخر کا باعث ہیں۔

انہوں نے تحمل، مساوات اور باہمی احترام پر مبنی جامع معاشرے کی قیام کی اہمیت پر زور دیا۔ کمیونٹی ویلفیئر اتاشی عمران شاہد اور جنید مرتضی نے بھی اس تقریب میں شرکت کرتے ہوئے اس خوشی کے موقع پر امن، خوشحالی اور خوشی کی دعا کی۔ پادری ولسن جارج نے قونصل جنرل اور قونصل خانے کے افسران کا شکریہ ادا کیا اور ان کی تقریب میں شرکت کو سراہا۔