وزیراعظم جلد ’’اپنا میٹر، اپنی ریڈنگ‘‘پروگرام کا آغاز کریں گے‘ سی ای او لیسکو انجینئر رمضان بٹ

لاہور(اُردو پوائنٹ اخبارتازہ ترین - این این آئی۔ 23 اپریل2025ء) لاہور الیکٹرک سپلائی کمپنی (لیسکو) کے چیف ایگزیکٹو آفیسر انجینئر رمضان بٹ نے لاہور چیمبر میں خطاب کے دوران بتایا ہے کہ وزیراعظم جلد ’’اپنا میٹر، اپنی ریڈنگ‘‘پروگرام کا آغاز کریں گے، اس پروگرام کے تحت صارفین کو ایک لنک فراہم کیا جائے گا جس کے ذریعے وہ اپنی میٹر ریڈنگ خود کرسکیں گے جسے تسلیم کیا جائے گا۔

اس موقع پر لاہور چیمبر کے صدر میاں ابوذر شاد، سینئر نائب صدر انجینئر خالد عثمان، نائب صدر شاہد نذیر چوہدری، سارک چیمبر کے نائب صدر میاں انجم نثار اور سابق صدر محمد علی میاں نے بھی اظہار خیال کیا۔ اجلاس میں ایگزیکٹو کمیٹی کے ارکان وقاص اسلم، فردوس نثار، کرامت علی اعوان، آصف ملک، احد امین ملک اور تنویر احمد بھی شریک تھے۔

(جاری ہے)

انجینئر رمضان بٹ نے کہا کہ وزیراعظم سمیت ہر شخص کو اس بات کا ادراک ہے کہ توانائی کے شعبے کی بقا، ملک کی بہتری کے لیے ناگزیر ہے۔

انہوں نے کہا کہ وزیراعظم کی کوششوں سے توانائی کے شعبے کی سمت درست ہو چکی ہے ۔ انہوں نے بتایا کہ لیسکو میں ایک ریپڈ ریسپانس فورس قائم کی گئی ہے جو خراب موسم یا دیگر وجوہات کی بنا پر ہونے والے بجلی کے تعطل کو فوری طور پر دور کرے گی۔ انہوں نے کاروباری برادری کے کردار کو سراہتے ہوئے کہا کہ یہ طبقہ بجلی خرید کر معیشت کا پہیہ چلا رہا ہے۔

سی ای او لیسکو نے کہا کہ اووربلنگ اور اوور ریڈنگ ہرگز نہیں ہوگی۔ لیسکو میٹر کی تبدیلی اور نئے کنکشن کی فراہمی سمیت تمام مسائل صارفین کے پاس جاکر حل کرے گا۔ انہوں نے لیسکو کے عملے کو عوامی خدمت گزار قرار دیتے ہوئے کہا کہ ان کی ذمہ داری بلاتعطل بجلی کی فراہمی کو یقینی بنانا ہے۔ انہوں نے کہا کہ لیسکو کے پاس سامان کی کوئی کمی نہیں ہے۔

انہوں نے بتایا کہ صنعتی فیڈرز پر ٹرپنگ نہ ہونے کے لیے عملے کو ہدایات جاری کر دی گئی ہیں۔ ایف آئی آرز کے حوالے سے ایک سوال کے جواب میں انہوں نے کہا کہ لیسکو اس بات کو یقینی بنا رہا ہے کہ کسی کے خلاف بلاوجہ کارروائی نہ ہو۔ انہوں نے تسلیم کیا کہ بعض اوقات صنعتی صارفین کی لاعلمی کے باعث میٹر سے متعلق مسائل پیدا ہوتے ہیں، تاہم میٹر ریڈرز کی یہ ذمہ داری ہے کہ وہ میٹرز کی نگرانی کریں۔

لاہور چیمبر کے صدر میاں ابوذر شاد نے کہا کہ اگرچہ ایم ڈی آئی فکسڈ چارجز کا معاملہ نیپرا کے دائرہ کار میں آتا ہے تاہم اس سے صنعتی صارفین کو بھاری نقصان ہو رہا ہے۔ نیپرا کی نئی پالیسی کے مطابق تمام صنعتی و کمرشل صارفین کو اپنی مختص شدہ لوڈ کا کم از کم 50 فیصد بل ادا کرنا ہوتا ہے، چاہے ان کا استعمال کچھ بھی ہو، جس سے انڈسٹری کی لاگت میں زبردست اضافہ ہو رہا ہے۔

انہوں نے مختلف مارکیٹوں میں لٹکی ہوئی بجلی کی تاروں پر تشویش کا اظہار کیا جو سنگین حفاظتی خطرہ ہیں اور کئی حادثات کا سبب بن چکی ہیں۔ لیسکو سے مطالبہ کیا گیا کہ متعلقہ دفاتر کو فوری طور پر اس خطرناک وائرنگ کو ہٹانے یا محفوظ کرنے کی ہدایت دی جائے۔سینئر نائب صدر انجینئر خالد عثمان اور نائب صدر شاہد نذیر چوہدری نے بلوں کی تاخیر سے ترسیل کا مسئلہ اٹھایا، جو اکثر صرف ایک یا دو دن پہلے موصول ہوتے ہیں جس سے بروقت ادائیگی ممکن نہیں رہتی اور لیسکو کی ٹیمیں فوری کنکشن کاٹ دیتی ہیں، جو صارفین کے لیے شدید پریشانی کا باعث بنتا ہے۔

میاں ابوذر شاد نے کہا کہ جب میٹر خراب ہو جائے یا ٹھیک کام نہ کر رہا ہو تو لیسکو صارفین کو سالانہ اوسط کے مطابق بل بھیجتا ہے۔ انہوں نے تجویز دی کہ اوسط بلنگ گزشتہ سال کے اسی مہینے کی کھپت کی بنیاد پر کی جائے اور خراب میٹرز کی فوری تبدیلی کو ترجیح دی جائے۔ایگزیکٹو کمیٹی کے ارکان نے بھی بجلی کے ترسیلی نظام میں ہونے والے بھاری نقصانات پر تشویش کا اظہار کیا جو پاکستان میں توانائی کی کمی کی بڑی وجہ ہیں۔

لاہور چیمبر کے عہدیداران نے لیسکو کی موبائل ایپ کے اجرا کو خوش آئند قرار دیا اور مطالبہ کیا کہ اس کی کلیدی خصوصیات ممبران کے ساتھ شیئر کی جائیں تاکہ وقت کی بچت ہو اور سروس تک رسائی آسان ہو۔ انہوں نے یہ بھی کہا کہ لیسکو ایک فوکل پرسن مقرر کرے جو چیمبر اور لیسکو کے متعلقہ حکام کے درمیان فوری رابطے کے لیے سہولت فراہم کرے تاکہ شکایات بروقت حل ہو سکیں۔