لاہورہائیکورٹ، تاریخی مقامات کا انتظامی کنٹرول محکمہ آثار قدیمہ کے حوالے کرنے کا حکم

بدھ 23 اپریل 2025 19:33

لاہور (اُردو پوائنٹ اخبارتازہ ترین - اے پی پی۔ 23 اپریل2025ء) لاہور ہائیکورٹ نے لاہور کے تاریخی ورثہ شالیمار باغ،مقبرہ جہانگیر،مقبرہ انار کلی اور قطب الدین ایبک سمیت چار تاریخی مقامات کا انتظامی کنٹرول محکمہ آثار قدیمہ پنجاب کے حوالے کرنے کا حکم دے دیا،عدالت نے والڈ سٹی لاہور اتھارٹی کو ان تاریخی مقامات کا کنٹرول فوری طور پر چھوڑنے کی ہدایت کرتے ہوئے ان کے حوالے سے جاری نوٹیفکیشن کو معطل کر دیا،اس سے قبل ان مقامات کا انتظام والڈ سٹی لاہور اتھارٹی کے پاس تھا،جسٹس شاہد کریم نے عرفان علی کی جانب سے دائر کردہ توہین عدالت کی درخواست پر سماعت کی،جس میں موقف اختیار کیا گیا کہ عدالتی پابندی کے باوجود والڈ سٹی انتظامیہ شالیمار باغ میں پرائیویٹ فنکشنز منعقد کروا رہی ہے،درخواست گزار کی جانب سے حافظ اللہ یار سپرا ایڈووکیٹ عدالت میں پیش ہوئے، عدالت نے چیف سیکرٹری پنجاب سے کل جمعرات تک فیصلے پر عملدرآمد کی رپورٹ طلب کرتے ہوئے مزید سماعت ملتوی کر دی۔