ڈیرہ غازی خان پولیس ، سی ٹی ڈی و رینجرز ٹیموں کی مشترکہ کارروائی، 2 دہشتگرد ہلاک، متعدد زخمی

بدھ 23 اپریل 2025 20:10

لاہور (اُردو پوائنٹ اخبارتازہ ترین - اے پی پی۔ 23 اپریل2025ء) پنجاب کے پی کے بارڈر پر ڈیرہ غازی خان پولیس، سی ٹی ڈی اور رینجرز ٹیموں نے مشترکہ طور پر کامیاب کاروائی کرتے ہوئے تھانہ وہوا کے علاقہ کوتانی تل میں 2 خوارجی دہشتگرد ہلاک اور متعدد زخمی کر دیئے۔ترجمان پنجاب پولیس نے بتایا کہ پٹرولنگ پر مامور پولیس، رینجرز اور سی ٹی ڈی ٹیموں نے دہشتگردوں کی موجودگی کی اطلاع پر فوری کارروائی کی جس کے بعد پولیس ٹیموں کا تھانہ وہوا کے علاقہ کوتانی تل میں خوارجی دہشت گردوں سے سامنا ہوا، خوارجی دہشتگرد راکٹ، ہینڈ گرنیڈ اور دیگر بھاری اسلحہ سے لیس تھے۔

پولیس، رینجرز اور سی ٹی ڈی کے جوانوں نے جوانمردی سے مقابلہ کیا جس کے نتیجہ میں دو خوارجی دہشتگرد ہلاک جبکہ متعدد زخمی ہوئے۔

(جاری ہے)

پولیس ٹیموں کی کارروائی سے دہشتگرد جھاڑیوں اور ٹیلوں کی اوٹ لے کر فرار ہو گئے جبکہ دہشتگردوں سے مقابلہ میں ایلیٹ اہلکار عدنان حبیب اور سی ٹی ڈی اہلکار غضنفر معمولی زخمی ہوگئے۔ ترجمان پنجاب پولیس نے مزید بتایا کہ پنجاب خیبرپختونخوا بارڈر کے قریب دہشتگردوں کی نقل و حرکت کے پیش نظر پولیس ہائی الرٹ تھی۔

اطلاع ملتے ہی ڈی پی او سید علی کی زیر قیادت بیک اپ ٹیمیں فوری موقع پر پہنچیں۔ پولیس، رینجرز اور سی ٹی ڈی ٹیموں کا سرحدی علاقے میں سرچ اور سویپ آپریشن جاری ہے۔ آئی جی پنجاب ڈاکٹر عثمان انور نے دہشتگردوں کو جہنم واصل کرنے پر ڈی جی خان پولیس کو شاباش دی۔