Live Updates

میکرو اکنامک اشاریوں میں بہتری کا رجحان، مہنگائی بڑھنے کا خدشہ

وزارت خزانہ نے ماہانہ اکنامک اپ ڈیٹ آئوٹ لک رپورٹ جاری کردی

جمعرات 24 اپریل 2025 21:30

کراچی(اُردو پوائنٹ اخبارتازہ ترین - این این آئی۔ 24 اپریل2025ء)پاکستان کے زیادہ تر معاشی اشاریوں میں بہتری کا رجحان تاہم مہنگائی میں اضافے کا خدشہ ہے۔وزارت خزانہ کی ماہانہ اقتصادی رپورٹ کے مطابق کرنٹ اکائونٹ سرپلس، ترسیلات زر اور برآمدات میں بھی نمایاں بہتری آئی تاہم اپریل میں مہنگائی کی شرح ڈیڑھ سے دو فیصد رہنے کا امکان ہے جو اگلے ماہ تین سے چار فیصد تک جا سکتی ہے۔

رواں مالی سال کے پہلے 9 ماہ میں کرنٹ اکائونٹ ایک ارب 85 کروڑ ڈالر سرپلس رہا۔ ترسیلات زر 33 فیصد اضافے کے ساتھ 28 ارب ڈالر سے تجاوز کر گئیں جبکہ برآمدات 24 ارب 66 کروڑ ڈالر ریکارڈ کی گئیں۔رپورٹ کے مطابق ٹیکس آمدن میں 25 فیصد اضافہ ہوا اور نان ٹیکس ریونیو بہتر اعشاریہ نو فیصد اضافے سے تین ہزار 933 ارب روپے رہا۔

(جاری ہے)

وزارت خزانہ کے مطابق صنعتی و زرعی شعبوں میں آئندہ مہینوں میں بتدریج بہتری متوقع ہے۔

رپورٹ کے مطابق براہ راست غیرملکی سرمایہ کاری میں 14 فیصد اضافہ ریکارڈ کیا گیا جو مجموعی طور پر ایک ارب 64 کروڑ ڈالر رہی۔ مارچ کے دوران 58 ہزار 55 افراد روزگار کے لیے بیرون ملک گئے۔ فروری کے مقابلے میں اوورسیز ایمپلائمنٹ رجسٹریشن میں 17 فیصد اضافہ ہوا۔ آٹو موبائل کی پیداوار اور خام مال کی درآمدات میں بھی تیزی آئی۔ موسمی حالات اور پانی کی بہتر فراہمی کے باعث زرعی شعبے میں بھی بہتری کی امید ظاہر کی گئی ہے۔