ضلعی انتظامیہ کوئٹہ کاشہر بھر میں روٹی کی قیمت اور وزن میں کمی کے خلاف سخت کریک ڈاؤن شروع

جمعرات 24 اپریل 2025 23:40

کوئٹہ (اُردو پوائنٹ اخبارتازہ ترین - اے پی پی۔ 24 اپریل2025ء) ضلعی انتظامیہ کوئٹہ نے شہر بھر میں روٹی کی قیمت اور وزن میں کمی کے خلاف سخت کریک ڈاؤن شروع کرتے ہوئے ضابطہ فوجداری کے تحت بڑی کاروائی کی ہے۔ ڈپٹی کمشنر کوئٹہ کی ہدایات پر عمل کرتے ہوئے مختلف علاقوں میں تندوروں کا معائنہ کیا گیا، جس کے دوران سرکاری نرخنامے کی خلاف ورزی کرنے والے نانبائیوں کے خلاف سخت ایکشن لیا گیا۔

کارروائی کے دوران107 تندور سیل کیے گئے۔168 نانبائیوں کو گرفتار کرکے92 نانبائیوں کو جیل منتقل کر دیا گیا۔اس حوالے سے ڈپٹی کمشنر کوئٹہ نے کہا کہ عوام کو سرکاری نرخوں پر روٹی کی فراہمی ہر صورت یقینی بنائی جائے گی، اور کسی قسم کی بلیک میلنگ یا منافع خوری برداشت نہیں کی جائے گی۔ انہوں نے تمام اسسٹنٹ کمشنرز اور اسپیشل مجسٹریٹس کو روزانہ کی بنیاد پر چیکنگ اور کارروائی کرنے کی ہدایت جاری کی ہے۔

(جاری ہے)

اس سلسلے میں اسسٹنٹ کمشنر (سٹی) کیپٹن عبداللہ بن عارف اور مجسٹریٹ احسام الدین نے کارروائیاں کرتے ہوئے 57 تندور سیل کیے، جبکہ 51 نانبائیوں کو گرفتار کر کے جیل بھجوا دیا گیا۔اس کے علاؤہ اسسٹنٹ کمشنر (صدر) کیپٹن حمزہ انجم اور مجسٹریٹ حسیب سردار نے کارروائیاں کرتے ہوئے 48 دکانداروں کو گرفتار کر کے جیل منتقل کر دیا جبکہ اسسٹنٹ کمشنر (کچلاک) نعمت اللہ ترین نے 18 تندور سیل کیے۔

اوراسسٹنٹ کمشنر (سریاب) سعد کلیم ظفر نے 6 تندور سیل کیے اور 23 نانبائیوں کو گرفتار کر کے جیل منتقل کیا۔ضلعی انتظامیہ کا کہنا ہے کہ یہ کارروائیاں آئندہ بھی تسلسل کے ساتھ جاری رہیں گی تاکہ عام شہریوں کو بنیادی سہولیات با آسانی اور سرکاری نرخ پر میسر آ سکیں۔ عوام سے گزارش ہے کہ کسی بھی شکایت کی صورت میں فوری طور پر ضلعی انتظامیہ یا متعلقہ اسسٹنٹ کمشنر سے رابطہ کریں۔