Live Updates

پاکستان کی جانب سے فضائی حدود کی بندش سے بھارتی ایئر لائنز کوہنگامی صورتحال کے باعث پروازوں کے رخ موڑنا پڑے

طویل دوارنیہ کی بین الاقوامی پروازیں کئی ممالک کے ایئرپورٹس پر اتاری گئیں، متعدد پروازوں کے روٹس بری طرح متاثر ہوئے

جمعہ 25 اپریل 2025 12:10

لاہور(اُردو پوائنٹ اخبارتازہ ترین - این این آئی۔ 25 اپریل2025ء)پاکستان کی جانب سے فضائی حدود کی بندش سے بھارتی ایئر لائنز میں ہنگامی صورتحال کے باعث پروازوں کے رخ موڑنا پڑے، طویل دوارنیہ کی بین الاقوامی پروازیں کئی ممالک کے ایئرپورٹس پر اتاری گئیں۔میڈیا رپورٹ کے مطابق شارجہ سے امرتسر کی پرواز 6 ای 1428 تربت سے پاکستانی حدود میں داخل ہونے والی تھی، نوٹم جاری ہونے کے بعد انڈیگو ایئر پرواز کا رخ موڑ دیا گیا، طیارہ خلیج آف عمان کے اوپر سے گزر کر اضافی فیول کیلئے احمد آباد ایئرپورٹ پر اترا۔

(جاری ہے)

ٹورنٹو سے ایئر انڈیا کی پرواز اے آئی 190 کو بھی ری فیولنگ کیلئے کوپن ہیگن اتار لیا گیا،پیرس سے ائیر انڈیا کی نیو دہلی کی پرواز اے آئی 148 کو ری فیولنگ کے لیے ابوظہبی اتارا گیا،لندن سے ایئر انڈیا کی پرواز اے آئی 162 کو بھی ابوظہبی ایئرپورٹ لینڈ کرایا گیا۔دہلی سے تبلیسی کیلئے روانہ ہوئی انڈیگو کی پرواز 6 ای 1807 احمد آباد اتاری گئی، الماتے اور تاشقند کیلئے انڈیگو ایئر کی 2 پروازیں 6 ای 1801 اور 1805 منسوخ کردی گئی۔ دہلی سے شارجہ کی انڈیگو کی پرواز چھ ای 9526 کو ری روٹ کیا گیا۔ دہلی بحرین کی ایئر انڈیا ایکسپریس کی پرواز آئی ایکس 145 کو ری روٹ کیا گیا۔