ملیریا کا خاتمہ اور صحت مند معاشرہ کی تشکیل اولین ترجیح ہے،مریم نواز

جمعہ 25 اپریل 2025 13:50

لاہور (اُردو پوائنٹ اخبارتازہ ترین - اے پی پی۔ 25 اپریل2025ء) وزیر اعلی پنجاب مریم نواز شریف نے کہا ہے کہ ملیریا کا خاتمہ اور صحت مند معاشرہ کی تشکیل اولین ترجیح ہے، عوام ملیریا کے خاتمے کے لئے احتیاطی تدابیر اختیار کریں ۔ جمعہ کے روز انسدادِ ملیریا کے عالمی دن کے موقع پر جاری اپنے ایک پیغام میں انہوں نے کہا کہ ملیریا ایک خطرناک مگر قابلِ علاج مرض ہے اس کے خاتمے کیلئے متحد ہونا ہوگا، پنجاب حکومت کی جانب سے انسدادِ ملیریا کے لیے جدید اور موثر حکمتِ عملی پر عملدرآمد جاری ہے۔

(جاری ہے)

وزیر اعلی مریم نواز نے کہا کہ پنجاب سے ملیریا کا خاتمہ اور صحت مند معاشرہ کی تشکیل ہماری اولین ترجیح ہے، اس موذی مرض سے بچائو کیلئے خصوصی فنڈز مختص کئے گئے ہیں۔ انہوں نے کہا کہ پنجاب کے ہر ضلع میں عوام کو اینٹی ملیریا سپرے مہمات، مفت ٹیسٹ اور علاج کی سہولت فراہم کی جا رہی ہے،ملیریا ہاٹ سپاٹ اور زیادہ متاثرہ علاقوں میں بروقت بہترین طبی امداد بہم پہنچائی جا رہی ہے ، پنجاب کا ہر بچہ، ہر ماں اور ہر خاندان ہماری ترجیح ہے اور ان کا تحفظ ہمارا مشن ہے۔ انہوں نے اپیل کی کہ عوام ملیریا کے خاتمے کیلئے احتیاطی تدابیر اختیار کریں صاف پانی کو ڈھانپیں اور مچھردانیوں کا استعمال کریں۔