سعودی عرب میں غیر قانونی تارکین کے خلاف کام کرنے والی مشترکہ کمیٹی کی کارروائی،19 ہزار غیر قانونی تارکین گرفتار

غیر قانونی تارکین کو کسی بھی قسم کی سہولت فراہم کرنا سنگین جرم ہے جس پر 15 سال قید اور 10 لاکھ ریال جرمانہ ہوسکتا ہے، سعودی وزارت داخلہ

اتوار 27 اپریل 2025 13:05

ریاض (اُردو پوائنٹ اخبارتازہ ترین - این این آئی۔ 27 اپریل2025ء)سعودی عرب میں غیر قانونی تارکین کے خلاف کام کرنے والی مشترکہ کمیٹی نے کارروائی کرتے ہویئے ایک ہفتے کے دوران 19ہزار غیر قانونی تارکین کو گرفتار کر لیا۔

(جاری ہے)

عرب میڈیا کے مطابق غیر قانونی تارکین کے خلاف کام کرنے والی مشترکہ کمیٹی کی جانب سے جاری بیان میں کہا گیا ہے کہ یہ گرفتاریاں 17 اپریل سے 23 اپریل 2025 کے درمیان ہوئی ہیں، جن میں سے 11245 اقامہ قوانین کی خلاف ورزی،4297 گرفتار شدگان سرحدی قوانین کی خلاف ورزی ،جبکہ 3786 تارکین لیبر قوانین کی خلاف ورزی اور 1360 افراد سرحد عبور کرنے کے الزام میں گرفتار کئے گئے۔

گرفتار افراد میں سے 44 فیصد یمنی، 54 فیصد ایتھوپی جبکہ دوفیصد دیگر ممالک کے تارکین شامل ہیں۔ کمیٹی نے کہا ہے کہ غیر قانونی تارکین کو سہولت فراہم کرنے پر 22 افراد گرفتار کئے گئے ہیں۔دوسری جانب سعودی وزارت داخلہ نے کہا کہ غیر قانونی تارکین کو کسی بھی قسم کی سہولت فراہم کرنا سنگین جرم ہے جس پر 15 سال قید اور 10 لاکھ ریال جرمانہ ہوسکتا ہے۔