پنجاب یونیورسٹی میں انڈرگریجوایٹ پروگرامز میں داخلوں کے لئے رجسٹریشن کا آغاز

اتوار 27 اپریل 2025 17:05

لاہور(اُردو پوائنٹ اخبارتازہ ترین - این این آئی۔ 27 اپریل2025ء)پنجاب یونیورسٹی نے انڈر گریجوایٹ پروگرامز میں داخلوں کے پہلے مرحلے کا آغاز کرتے ہوئے امیدوارں کی انٹری ٹیسٹ کی آن لائن رجسٹریشن شروع کر دی ہے۔ترجمان پنجاب یونیورسٹی نے کہا کہ پنجاب یونیورسٹی کے انڈرگریجوایٹ پروگرامز کے 2025 سیشن میں داخلوں کے لئے انٹری ٹیسٹ لازمی ہے جس میں شرکت کے لئے امیدوار 26 مئی تک آن لائن رجسٹریشن کرا سکتے ہیں۔

(جاری ہے)

انہوں نے کہا کہ انڈر گریجوایٹ پروگرامز میں داخلوں کے لئے انٹری ٹیسٹ 15 جون کو متوقع ہے۔ انہوں نے کہا کہ انٹری ٹیسٹ کا انعقاد پاکستان کے تمام بڑے شہروں میں کیا جائے گا۔ انہوں نے کہا کہ پنجاب یونیورسٹی میں داخلوں کے لئے 25 فیصد نمبر تحریری داخلہ امتحان کے لئے مختص ہیں اور تمام انڈرگریجوایٹ پروگرامز کے لئے 7 مختلف انٹری ٹیسٹ لئے جائیں گے۔ انہوں نے کہا کہ امیدوار اہلیت کے معیار اور دیگر تفصیلات کے لئے ویب سائٹ پر رجوع کریں۔