Live Updates

سابق کپتان نے پہلگام واقعہ کو بھارت کا ڈرامہ قرار دیدیا

کیسے ممکن ہے نامعلوم افراد ایک گھنٹے تک کارروائی کرتے رہے اور 8 لاکھ فوج آئی نہیں، شاہد آفریدی

اتوار 27 اپریل 2025 17:10

کراچی (اُردو پوائنٹ اخبارتازہ ترین - این این آئی۔ 27 اپریل2025ء)قومی ٹیم کے سابق کپتان شاہد آفریدی نے کہا ہے کہ پہلگام واقعہ بھارت کا بہت بڑا ڈرامہ ہے، انکی پہلے ہی پاکستان سے کھیلنے کی نیت نہیں ہے۔نیشنل ہاکی اسٹیڈیم کے دورے کے دوران میڈیا سے گفتگو کرتے ہوئے سابق آل راؤنڈر و کپتان شاہد آفریدی نے کہا کہ پہلگام واقعے پر نظر ڈالیں تو صرف ڈرامہ نظر آتا ہے، کیسے ممکن ہے نامعلوم افراد ایک گھنٹے تک کارروائی کرتے رہے اور 8 لاکھ فوج آئی نہیں۔

انہوں نے کہا کہ بھارتی اپنے لوگوں کو خود مروا کر خود زندہ کروادیتے ہیں، ہم نے ہمیشہ کوشش کی ہے کہ بھارت کے ساتھ اچھے تعلقات ہوں لیکن وہاں سے ہمیشہ منفی جواب ملا۔سابق کرکٹر نے کہا کہ 2016 ٹی20 ورلڈکپ کے دوران حالات کشیدہ ہونے کے باوجود پاکستانی ٹیم بھارت گئی، ہمیں خود نہیں معلوم تھا جانا ہے یا نہیں، کبڈی کی بھارت کی ٹیم آجاتی ہے کرکٹ کی ٹیم نہیں آتی، اگر بند کرنا ہے تو تمام چیزیں بند کرو۔

(جاری ہے)

شاہد آفریدی نے کہا کہ پاکستان سپر لیگ (پی ایس ایل) کا آغاز جنہوں نے کیا تھا انہیں کو جاری رکھنا چاہیے تھا، سن رہا ہوں فرنچائز مالکان مالی نقصان کا کہہ رہے ہیں، کافی فرنچائز مالکان نے فائدہ بھی اٹھایا ہے۔سابق کرکٹر نے کہا کہ محمد رضوان نے جب جنوبی افریقا کو شکست دی تو تب کیوں نہیں کہا میرے ہاتھ میں کچھ نہیں ہے، جب کپتان بنایا جائے تو اسے بہانے نہیں کرنے چاہیے، مجھے پاکستان کرکٹ ٹیم سے کوئی لگاؤ نہیں ہے، مجھ سے کام لینا ہے تو گراس روٹ لیول پر کام لیا جائے۔

شاہد آفریدی نے قومی کھیل ہاکی پر گفتگو کرتے ہوئے کہا کہ آج گراؤنڈز اور کھیل تباہی کا شکار ہے، ہماری اسپورٹس منسٹری کا قومی کھیل کی طرف سے دھیان نہیں، وزیراعظم شہباز شریف کھیل سے لگاؤ رکھتے ہیں، امید ہے وہ ہاکی پر توجہ دیں گے۔شاہد آفریدی نے آرمی چیف جنرل عاصم منیر سے ملاقات پر کہا کہ کسی کی چغلی نہیں کی اور نہ کسی سے چھپ کر ملا۔