Live Updates

چین میں شنگھائی تعاون تنظیم کی وزرائے صحت کانفرنس میں مصطفی کمال نے پاکستان کی نمائندگی کی

وفاقی وزیر صحت کی ایرانی ہم منصب سے ملاقات ،صحت کے شعبے میں دو طرفہ تعاون اور باہمی دلچسپی کے امور پر تفصیلی تبادلہ خیال پاکستان اور ایران دونوں برادر اور پڑوسی ممالک ہیں اور ان کے درمیان گہرے اور دوستانہ تعلقات قائم ہیں، مصطفی کمال

اتوار 27 اپریل 2025 17:35

اسلام آباد(اُردو پوائنٹ اخبارتازہ ترین - این این آئی۔ 27 اپریل2025ء)چین میں شنگھائی تعاون تنظیم کی وزرائے صحت کانفرنس میں وفاقی وزیر صحت مصطفی کمال نے پاکستان کی نمائندگی کی۔کانفرنس کے دوران مصطفی کمال نے ایرانی وزیر صحت سے خصوصی ملاقات کی جس میں صحت کے شعبے میں دو طرفہ تعاون اور باہمی دلچسپی کے امور پر تفصیلی تبادلہ خیال کیا گیا۔ اس موقع پر مصطفی کمال نے کہا کہ پاکستان اور ایران دونوں برادر اور پڑوسی ممالک ہیں اور ان کے درمیان گہرے اور دوستانہ تعلقات قائم ہیں۔

ملاقات میں خصوصی طور پر صحت کے شعبے میں سیاحت (ہیلتھ ٹورازم) اور ٹیلی میڈیسن کے فروغ پر بھی بات چیت ہوئی۔ مصطفی کمال نے کہا کہ ٹیلی میڈیسن کے فروغ کے لیے مربوط حکمت عملی کے تحت تیزی سے کام جاری ہے اور جدید ٹیکنالوجی سے بھرپور استفادہ حاصل کیا جا رہا ہے۔

(جاری ہے)

مزید برآں دونوں وزرائے صحت نے سرحدی علاقوں میں متعدی بیماریوں پر قابو پانے کے لیے مشترکہ اقدامات کو مزید مضبوط بنانے پر اتفاق کیا۔

مصطفی کمال نے کہا کہ "بیماریوں کی کوئی سرحد نہیں ہوتی" اور اس تناظر میں بین الاقوامی ریگولیشنز کی سفارشات پر عمل درآمد کو یقینی بنایا جائیگا،ملاقات کے اختتام پر دونوں ممالک نے صحت کے شعبے میں قریبی تعاون بڑھانے کے عزم کا اعادہ کیا۔ مصطفی کمال نے اس موقع پر کہا کہ پاکستان کے عوام کی بہتری کے لیے صحت کے شعبے میں ایران کے ساتھ تعاون جاری رہے گا۔