زمرّد خان کا طلبہ کو علم کو خدمت میں ڈھالنے کا مشورہ

اسلام آباد(اُردو پوائنٹ اخبارتازہ ترین - این این آئی۔ 27 اپریل2025ء)معروف سماجی رہنما اور سابق سربراہ پاکستان بیت المال زمرّد خان نے طلبہ کو علم کو خدمت میں ڈھالنے کا مشورہ دیتے ہوئے کہا کہ یہ دن نوجوانوں کی محنت، والدین کی دعاؤں اور اساتذہ کی رہنمائی کا ثمر ہے اور یہ اختتام نہیں بلکہ ایک نئے سفر کی شروعات ہے۔ان خیالات کا اظہار انہوں نے گذشتہ روز ہمدرد یونیورسٹی اسلام آباد کیمپس کی 18ویں ڈگری ایوارڈنگ تقریب سے بطور مہمان خصوصی اپنے خطاب کے دوران کیا،اس موقع پریونیورسٹی کی چانسلر سعدیہ راشد،وائس چانسلر پروفیسر ڈاکٹر شبیب الحسن، ڈائریکٹر جنرل امتیاز حیدراور دیگر بھی موجود تھے۔

اپنے خطاب کے دوران زمرّد خان نے اپنی زندگی کے تجربات کا حوالہ دیتے ہوئے نوجوانوں کو انسانیت، خدمت اور قومی تعمیر کے جذبے سے سرشار ہونے کی تلقین کی۔

(جاری ہے)

انہوں نے کہا کہ پاکستان کے ہسپتال، اسکول اور یتیم خانے نوجوان نسل کے علم اور جذبے کے منتظر ہیں، علم اگر دل سے جلے تو پوری قوم کو روشن کر دیتا ہے،زمرد خان نے جامعہ ہمدرد کی انتظامیہ، اساتذہ، والدین اور طلبہ کو اس اہم موقع پر مبارکباد پیش کی اور کامیاب مستقبل کے لیے نیک تمناؤں کا اظہار کیا،چانسلر سعدیہ راشد نے اپنے خطاب میں تمام مہمانانِ گرامی، والدین، اساتذہ اور طلباء کو خوش آمدید کہتے ہوئے کہا کہ ان کو ملنے والا صدارتی ایوارڈ ہلال امتیاز اٴْن کی اجتماعی کاوشوں کا نتیجہ ہے اور وہ یہ اعزاز تمام ساتھیوں کے نام کرتی ہیں،انہوں نے حکیم محمد سعید شہید کے مشن کو آگے بڑھانے پر تمام ادارہ جاتی ٹیم کا شکریہ ادا کیا اور کہا کہ اٴْن کے لگائے ہوئے تعلیمی پودے آج بارآور ہو چکے ہیں،وائس چانسلر کی قیادت اور اساتذہ کی بصیرت کو اس کامیابی کا ضامن قرار دیا،سعدیہ راشد نے طلبا و طالبات کو مبارکباد دیتے ہوئے محترمہ نے کہا کہ آج کا دن آپ کی عملی زندگی کے آغاز کی نوید ہے، ڈگری محض کاغذی سند نہیں، بلکہ فکری بلندی، ذہنی بلوغت اور خود انحصاری کی علامت ہے، اٴْنہوں نے نوجوانوں کو علم و عمل کا پیکر بننے، قومی و اجتماعی مفاد کو ترجیح دینے اور پاکستان کی تعمیر و ترقی میں بھرپور کردار ادا کرنے کی تلقین کی،وائس چانسلر ڈاکٹر شبیب الحسن نے اپنے خطاب میں کہا کہ آج جامعہ ہمدرد کے کراچی اور اسلام آباد کیمپسز میں تقریباً 35 مختلف تعلیمی پروگرامز بشمول بی ایس، ایم ایس اور پی ایچ ڈی کے تحت تعلیم دی جا رہی ہیاور اسلام آباد کیمپس میں تقریباً 3000 طلباء زیرِ تعلیم ہیں۔

انہوں نے کہا کہ جامعہ ہمدرد کا مقصد نہ صرف معیاری تعلیم فراہم کرنا ہے بلکہ دنیا بھر میں تحقیقی معیار کو بلند کرنا، ہنر مند انسانوں کی تربیت کرنا اور ذمہ دار شہریوں کی تشکیل بھی ہماری ترجیحات میں شامل ہیں،جامعہ ہمدرد ایک غیر منافع بخش ادارہ ہے جو صرف پاکستان کی خدمت کے لیے وقف ہے اور اس کے تعلیمی اخراجات دوسرے نجی اداروں کی نسبت کم ہیں، اس کے علاوہ جامعہ نے میرٹ اسکالرشپس، رشتہ داری اسکالرشپس اور ضرورت کے مطابق مالی امداد جیسی سہولتیں بھی فراہم کی ہیں، انہوں نے حکومت اور ہائر ایجوکیشن کمیشن سے اپیل کی کہ وہ اس تعلیمی ادارے کو تحقیق کے لیے مالی مدد کریں تاکہ انفلیشن اور وسائل کی کمی جیسے چیلنجز کا مقابلہ کیا جا سکے اور عالمی سطح پر ادارے کی شہرت میں مزید اضافہ ہو سکے۔

ڈائریکٹر جنرل ہمدرد یونیورسٹی اسلام آباد کیمپس امتیاز حیدر نے خطاب کرتے ہوئے کہا کہ آج کا دن ہمارے طلبہ کی انتھک محنت، والدین کی دعاؤں، اور اساتذہ کی مخلصانہ کاوشوں کا مظہر ہے، یہ دن جہاں کامیابی کا جشن ہے، وہیں یہ ہمیں ہمارے بانی شہید حکیم محمد سعید کی تعلیمات اور وڑن کی یاد بھی دلاتا ہے،انہوں نے بتایا کہ اسلام آباد کیمپس میں اس وقت چھ فیکلٹیز اور 35 سے زائد تعلیمی پروگرامز میں 3000 سے زیادہ طلبہ زیر تعلیم ہیں۔

کیمپس میں کیریئر کونسلنگ، ویلنیس سینٹر، اسٹوڈنٹ فیسلیٹیشن سینٹر، ڈے کیئر، انٹرنیشنل آفس، کوالٹی انہانسمنٹ سیل اور ریسرچ، انوویشن و کمرشلائزیشن کے دفاتر طلبہ کو ذاتی اور پیشہ ورانہ ترقی کے مواقع فراہم کر رہے ہیں، تقریب میں بتایا گیا کہ ہمدرد یونیورسٹی اسلام آباد نہ صرف تدریسی و تحقیقی میدان میں سرگرم عمل ہے بلکہ IEEE جیسے بین الاقوامی اداروں سے وابستگی، اور Ignite جیسے قومی اداروں سے فنڈڈ منصوبے اس کی کامیابیوں کا ثبوت ہیں۔

حال ہی میں بین الاقوامی سطح کی ایک کانفرنس کا انعقاد بھی اسی وژن کا مظہر تھا،ہمدرد یونیورسٹی کے ڈائریکٹر جنرل امتیاز احمد نے تقریب میں سالانہ رپورٹ پیش کرتے ہوئے کہا کہ اسلام آباد کیمپس سے آج 390 طلبہ کو ڈگریاں دی جا رہی ہیں۔ ان میں65 ڈگریاں فیکلٹی آف مینیجمنٹ سائنسز، 126 ڈگریاں فیکلٹی آف انجینئرنگ اینڈ ٹیکنالوجی، 147 ڈگریاں فکیلٹی آف فارمیسی جبکہ فیکلٹی آف سوشل سائنسز کی 52 ڈاگریاں دی جا رہی ہیں،ان میں 326 ڈگریاں انڈر گریجویٹس، 63 گریجویٹس اور 1 پوسٹ گریجویٹس کی ڈگریاں ہیں۔