وزیر اعلیٰ بلوچستان کا نصیرآباد میں ہندو تاجر کے اغوا کے واقعے کا نوٹس ،متعلقہ حکام کومغوی تاجرکی بحفاظت بازیابی یقینی بنانے کی ہدایت

اتوار 27 اپریل 2025 22:50

کوئٹہ (اُردو پوائنٹ اخبارتازہ ترین - اے پی پی۔ 27 اپریل2025ء) ترجمان حکومت بلوچستان شاہد رند نے کہا ہے کہ وزیر اعلیٰ بلوچستان میر سرفراز بگٹی نے نصیرآباد میں ہندو تاجر کے اغوا کے واقعے کا سختی سے نوٹس لیتے ہوئے متعلقہ حکام کو مغوی تاجر کی بحفاظت بازیابی یقینی بنانے کی ہدایت کی ہے۔

(جاری ہے)

اپنے ایک بیان میں انہوں نے کہا کہ واقعہ انتہائی تشویشناک ہے اور صوبائی حکومت مغوی تاجر کی بحفاظت بازیابی کیلئے تمام دستیاب وسائل بروئے کار لا رہی ہے ،انہوں نے بتایا کہ پولیس اور قانون نافذ کرنے والے ادارے پوری طرح متحرک ہیں اور جلد مثبت پیشرفت متوقع ہے ۔

انہوں نے کہا کہ واقعہ میں ملوث عناصر کو قانون کے کٹہرے میں لایا جائے گا اور کسی کو قانون ہاتھ میں لینے کی اجازت نہیں دی جائے گی ،انہوں نے مزید کہا کہ عوام کے جان و مال کا تحفظ حکومت بلوچستان کی اولین ترجیح ہے اور وزیر اعلیٰ بلوچستان میر سرفراز بگٹی کی واضح ہدایات ہیں کہ مجرمانہ سرگرمیوں میں ملوث افراد کے خلاف سخت کارروائی کی جائے۔