Live Updates

ترجمان سندھ حکومت نے سندھ کے وکلا سے دھرنا ختم کرنے کی اپیل کردی

وکلابرادری دھرنوں کو فی الفور ختم کرے، راستے کھولے، راستے بلاک ہونے سے تجارت متاثر ہو رہی ہے، معیشت کو خطرات لاحق ہیں،بیرسٹرارسلان اسلام شیخ

پیر 28 اپریل 2025 15:45

سکھر (اُردو پوائنٹ اخبارتازہ ترین - این این آئی۔ 28 اپریل2025ء)ترجمان سندھ حکومت اور میئر سکھر بیرسٹرارسلان اسلام شیخ نے سندھ کے وکلا سے دھرنا ختم کرنے کی اپیل کردی۔تفصیلات کے مطابق ترجمان سندھ حکومت بیرسٹر ارسلان اسلام شیخ نے وکلاسے دھرناختم کرنیکی اپیل کرتے ہوئے کہا کہ وکلابرادری دھرنوں کو فی الفور ختم کرے، راستے کھولے، راستے بلاک ہونے سے تجارت متاثر ہو رہی ہے، معیشت کو خطرات لاحق ہیں۔

ترجمان نے کہاکہ مویشی راستوں میں پھنسے ہوئے ہیں،ان کی جانوں کوخطرہ ہے، ادویات اور ایندھن کی سپلائی رکی ہوئی ہے، ہرقسم کی زرعی اجناس اور تجارت رکی ہوئی ہے۔بیرسٹر ارسلان نے کہا کہ وہ چیز ڈی نوٹیفائی ہوتی ہے جس کانوٹیفکیشن جاری ہو، کینالوں کاکبھی نوٹیفکیشن جاری ہی نہیں ہوا، کینالوں کی ڈی نوٹیفکیشن کا مطالبہ کیا جا رہا ہے۔

(جاری ہے)

انھوں نے بتایا کہ ایک تجویز تھی،جوایکنک اورسی سی آئی جیسے متعلقہ فورمز سے منظور ہی نہیں ہوئی ، کینالوں کا مسئلہ حل ہو چکا ہے، چیئرمین بلاول بھٹو نے جمہوری طریقے سے سندھ کا مقدمہ لڑا، بات واضح ہو گئی ہے کہ اتفاق رائے کے بغیر یہ کینالز نہیں بنیں گے۔

ترجمان سندھ حکومت نے کہا کہ اس وقت مودی پاکستان کو دھمکیاں دے رہا ہے، سرحدوں پر مسائل کا سامنا ہے، ہمیں مل کر پاکستان کی جنگ لڑنی ہوگی۔انھوں نے مزید کہا کہ کینال منسوخی کی رسمی کارروائی سی سی آئی اجلاس میں پوری ہو جائے گی۔