ڈسکہ میں پسند کی شادی نہ ہونے پر دلہن کے عاشق نے دلہا کو قتل کر دیا

پیر 28 اپریل 2025 20:00

ڈسکہ (اُردو پوائنٹ اخبارتازہ ترین - اے پی پی۔ 28 اپریل2025ء) پسند کی شادی نہ ہونے پر دلہن کے عاشق نے دلہا کو قتل کر دیا ۔ تفصیلات کے مطابق دھیدووالی کے رہائشی محمد جاوید عرف عدنان کی شادی تھانہ ستراہ کے موضع منڈیکی میں ہوئی گزشتہ رات وہ اپنی دعوت ولیمہ کے بعد سسرال پہنچا تو وہاں پر دلہن کے عاشق محمد بوٹا نے اس پر فائرنگ کر دی ،جاوید کو تشویشناک حالت کے پیش نظر سول ہسپتال ڈسکہ سے گوجرانوالہ ریفر کیاگیا مگر وہ راستے میں ہی دم توڑ گیا ۔

(جاری ہے)

ایف آئی آر کے مطابق دلہن الفا سویرا اپنے عاشق محمد بوٹاسے شادی کرنا چاہتی تھی مگر گھر والوں نے زبردستی اسکی شادی محمد جاوید سے کر دی تھی ۔دلہا کے والد محمد ناصر کی مدعیت میں دلہن اور اسکے عاشق کے خلاف مقدمہ درج کر دیا گیا ۔مقتول کے والد کے مطابق دلہن نے مقتول دلہا کی جیب سے سلامیوں والے پیسے،طلائی انگوٹھی،پرس اور موبائل فون بھی نکال لیا ۔ستراہ پولیس نے میت سول ہسپتال ڈسکہ کے مردہ خانہ منتقل کر دی اور مقدمہ درج کر کے مزید کارروائی کا آغاز کر دیا۔