لاہور کیلئے بڑا اعزاز، عالمی ایجنسی نے گلوبل 249شہروں میں سب سے زیادہ محفوظ قرار دے دیا

ْلاہور نیو یارک، لندن، واشنگٹن، برلن، استنبول، پیرس سے ذیادہ محفوظ ہے، عالمی ایجنسی رپورٹ

پیر 28 اپریل 2025 21:50

لاہور (اُردو پوائنٹ اخبارتازہ ترین - این این آئی۔ 28 اپریل2025ء) کرائم اینڈسیفٹی انڈیکس 2025ء نے جاری کردہ رپورٹ میں لاہور کو گلوبل 249شہروں میں سب سے زیادہ محفوظ قرار دیا ہے۔مستند عالمی ایجنسی نمبیو کی رپورٹ کے مطابق لاہور کے کرائم انڈیکس میں واضح کمی رپورٹ ہوئی۔رپورٹ کے مطابق عالمی کرائم انڈیکس میں لاہور کا 37واں، محفوظ شہروں میں 63واں نمبر ہے۔

عالمی ایجنسی رپورٹ نے کہا کہ کرائم فائٹنگ کی بہترحکمت عملی کی بدولت لاہور محفوظ شہروں میں سرفہرست ہے۔عالمی ایجنسی نے اپنی رپورٹ میں کہا کہ لاہور کی تاریخ میں پہلی بار کرائم میں واضح کمی آئی ہے، لاہور نیو یارک، لندن، واشنگٹن، برلن، استنبول، پیرس سے زیادہ محفوظ ہے۔اعدادوشمار کے مطابق گزشتہ ایک سال میں لاہور میں جرائم کی شرح میں واضح کمی واقع ہوئی ہے، اپریل سے اپریل 2023-24ء میں 67585جبکہ 2024-25ء میں 34091جرائم رپورٹ ہوئے، ڈکیتی قتل میں 64فیصد، ڈکیتی میں 55فیصد کمی واقع ہوئی۔

(جاری ہے)

اعداد و شمار کے مطابق موٹرسائیکل چوری میں 33، چھیننے میں 42فیصد کمی واقع ہوئی، کار چوری میں 33فی صد، دیگر گاڑیوں کی چوری میں 39فیصد کمی واقع ہوئی، محکمانہ احتساب میں 400سے زائد افسران و اہلکاروں کو سزائیں دی گئیں، جرائم ثابت ہونے پر 4ایس ایچ اوز تک کو انہی کے تھانوں میں بند کیا گیا۔ڈی آئی جی آپریشنز فیصل کامران نے کہا کہ ڈیٹا اور ٹیکنالوجی کے استعمال سے کرائم ہاٹ سپاٹس کی نشاندہی کی، کرائم پاکٹس میں ہیومین ریسورس اور وسائل میں اضافہ کیا گیا، اشتہاری، مفرور و عادی مجرمان کو جیلوں میں ڈالا گیا، میرٹ پر تعیناتیاں عمل میں لا کر نوجوان افسران کو موقع دیا گیا۔

ڈی آئی جی آپریشنز نے کہا کہ لا اینڈ آرڈر کے بہت سے چیلنجز کے باوجود کامیابی ٹیم ورک کا نتیجہ ہے، سیاسی حمایت اور عدم دبا کی بدولت کھل کر پالیسی بنانے اور اس پر عمل درآمد کا موقع ملا، مستقبل کا ہدف واضح ہے، لاہور کو عالمی سطح پر محفوظ ترین بنانا ہے۔