سندھ ہائی کورٹ کی لاپتہ افراد کی بازیابی کو یقینی بنانے کی ہدایت

ْ 15 دن کی مہلت دے رہے ہیں ورنہ ہم اکاؤنٹنٹ جنرل سندھ کو طلب کریں گے‘جسٹس ظفر احمد راجپوت

منگل 29 اپریل 2025 15:31

کراچی (اُردو پوائنٹ اخبارتازہ ترین - این این آئی۔ 29 اپریل2025ء)سندھ ہائی کورٹ نے لاپتہ افراد کی بازیابی کو یقینی بنانے کی ہدایت کر دی۔لاپتہ افراد کی بازیابی سے متعلق درخواست پر سماعت سندھ ہائی کورٹ میں ہوئی۔دوران سماعت عدالت نے سوال کیا کہ سرجانی ٹاؤن سے لاپتہ مظفر علی سے متعلق کیا پیش رفت ہی فوکل پرسن محکمہ داخلہ نے کہا کہ لاپتہ شہری کے اہلخانہ کی مالی معاونت کے لیے سمری منظور ہو چکی ہے۔

سرکاری وکیل نے کہا کہ مہلت دی جائے اہلخانہ کی مالی معاونت کی جائے گی۔ عدالت نے سوال کیا کہ پہلے تو آپ کہہ رہے تھے کہ 2 ہفتوں میں مالی معاونت ہو جائے گی، اب مزید مہلت کیوں مانگ رہے ہیں ادارے لوگوں کی آسانی کے لیے بنائے گئے ہیں یا نہیں سرکاری وکیل نے کہا کہ دو تین محکموں کا کام ہے۔

(جاری ہے)

جسٹس ظفر احمد راجپوت نے سوال کیا کہ اور ان محکموں میں کام نہیں ہوتا، ایسا ہے نا گزشتہ 2 ماہ سے آپ عدالت سے مہلت طلب کر رہے ہیں، 15 دن کی مہلت دے رہے ہیں ورنہ ہم اکاؤنٹنٹ جنرل سندھ کو طلب کریں گے۔

عدالت نے سرکاری وکیل سے 15 دن کے اندر رپورٹ طلب کر لی۔سچل سے لاپتہ فدا حسین، ظہیر اور عباس سے متعلق سماعت کچھ دیر کے لیے ملتوی کر دی گئی۔عدالت نے تفتیشی افسر سے سوال کیا کہ آپ نے درخواست گزار سے رابطہ کیوں نہیں کیا 3 لوگ لاپتہ ہیں، گاڑی کا نمبر بھی دیا گیا ہے، نہ لوگوں کا پتہ چلا، نہ ہی آپ گاڑی ڈھونڈ سکے، درخواست گزار سے رابطہ کر کے فوری رپورٹ پیش کریں۔سندھ ہائی کورٹ نے شہری عارف کی گمشدگی سے متعلق پیش رفت رپورٹ طلب کر لی۔عدالت نے لاپتہ شہری بشیر، شوکت و دیگر سے متعلق بھی پیش رفت رپورٹ طلب کر لی۔