راولپنڈی، انٹرمیڈیٹ فرسٹ اینول امتحانات 2025 کا آغاز ہو گیا ہے

منگل 29 اپریل 2025 19:53

راولپنڈی (اُردو پوائنٹ اخبارتازہ ترین - اے پی پی۔ 29 اپریل2025ء) بورڈ آف انٹرمیڈیٹ اینڈ سیکنڈری ایجوکیشن راولپنڈی کے تحت انٹرمیڈیٹ فرسٹ اینول امتحانات 2025 کا آغاز ہو گیا ہے۔ اس سلسلے میں چیئرمین بورڈ محمد عدنان خان اور کنٹرولر امتحانات تنویر اصغر اعوان نے مختلف امتحانی مراکز کا دورہ کیا اور انتظامات کا تفصیلی جائزہ لیا۔امتحانات کے پہلے روز سائیکالوجی، فوڈ اینڈ نیوٹریشن، ملٹری سائنس اور ہوم اکنامکس کے پرچے لیے جا رہے ہیں۔

راولپنڈی ڈویژن میں 185 امتحانی مراکز قائم کیے گئے ہیں جن میں 1762 سے زائد عملہ فرائض سرانجام دے رہا ہے۔ دفعہ 144 کے تحت غیر متعلقہ افراد کا امتحانی مراکز میں داخلہ مکمل طور پر ممنوع قرار دیا گیا ہے۔ امتحانی شفافیت کو یقینی بنانے کے لیے تمام مراکز میں سی سی ٹی وی کیمرے نصب کیے گئے ہیں، جن کی آن لائن نگرانی کی جا رہی ہے۔

(جاری ہے)

جعلی امیدواروں کے خلاف سخت کارروائی عمل میں لائی جائے گی، جنہیں یو ایم سی کیسز، جرمانے اور حوالات کی سزائیں دی جا سکتی ہیں۔

امتحانی نظام کی نگرانی کے لیے ہر ضلع میں علیحدہ کنٹرول رومز جبکہ بورڈ دفتر میں مرکزی کنٹرول روم مکمل طور پر فعال ہے۔ ضلعی انتظامیہ کی مکمل معاونت حاصل ہے اور سپیشل برانچ کو امتحانی عملے کی فہرستیں فراہم کر دی گئی ہیں۔ چیئرمین بورڈ محمد عدنان خان نے اس موقع پر کہا کہ وزیراعلیٰ پنجاب محترمہ مریم نواز کے ویژن اور حکومت پنجاب کی زیرو ٹالرنس پالیسی پر مکمل عملدرآمد کیا جا رہا ہے۔کنٹرولر امتحانات تنویر اصغر اعوان نے کہا ہے کہ بوٹی مافیا کے خلاف شکنجہ مزید سخت کر دیا گیا ہے۔ چھاپہ مار ٹیمیں تشکیل دے دی گئی ہیں جو کسی بھی غیر قانونی سرگرمی پر فوری کارروائی کریں گی۔\378