Live Updates

سندھ طاس معاہدہ کی منسوخی عالمی قوانین کی خلاف ورزی اور آبی جارحیت کی شکل میں کھلم کھلی دہشت گردی ہے، اسسٹنٹ کمشنر شیرانی

منگل 29 اپریل 2025 23:41

کوئٹہ (اُردو پوائنٹ اخبارتازہ ترین - اے پی پی۔ 29 اپریل2025ء) اسسٹنٹ کمشنر شیرانی یوسف ہاشمی نے کہا ہے کہ سندھ طاس معاہدہ کی منسوخی عالمی قوانین کی خلاف ورزی اور آبی جارحیت کی شکل میں کھلم کھلی دہشت گردی ہے جس کی ہم بھرپور مذت کرتے ہیں۔ ان خیالات کا اظہار انہوں نے گورنمنٹ بوائز ہائی سکول مانی خواہ میں ضلعی انتظامیہ شیرانی کے زیر اہتمام بھارت کی جانب سے پاکستان پر بے بنیاد جھوٹے الزامات کی آڑ میں عالمی برادری کو گمراہ کرنے کی نا کام کوشش اور شرمناک آبی جارحیت کے خلاف منعقدہ سیمینار سے خطاب کرتے ہوئے کیا ۔

قبل ازیں یوسف ہاشمی کی سربراہی میں بھارتی جارحیت کے خلاف اور پاک فوج کی حمایت میں ایک ریلی نکالی گئی ۔ ریلی کے شرکاءنے بھارتی جارحیت کے خلاف نعرے بازی کی۔

(جاری ہے)

ریلی اور سمینار میں مختلف محکموں کے افسران ،اساتذہ کرام ،طالبعلموں اور مختلف علاقوں سے آئے ہوئےمعززین نے شرکت کی ۔ یوسف ہاشمی و دیگر نے کہا کہ پاک فوج کے ساتھ شیرانی کے عوام اور تمام غیور محب وطن پاکستانی ایک پیج پر ہیں ۔ مقررین نے کہا کہ بھارت کا اپنے کیے دھرے پر واویلا اور بے بنیاد الزام تراشیاں بھارت جیسے مکار دشمن کی بوکھلاہٹ کا مثالی نمونہ ہے جس کی وجہ سے بھارت کا بدنما چہرہ پوری دنیا کے سامنے بے نقاب ہوچکا ہے ،ہم پاک فوج کے شانہ بشانہ کھڑے ہیں اور آخری دم تک کھڑے رہیں گے۔