سیالکوٹ حاجی کیمپ میں عازمین حج کی سہولت کے لئے خصوصی انتظامات

منگل 29 اپریل 2025 23:41

سیالکوٹ (اُردو پوائنٹ اخبارتازہ ترین - اے پی پی۔ 29 اپریل2025ء) انچارج حج آپریشن سیالکوٹ سید مجیب اکبر شاہ نے کہا ہے کہ اللہ تعالیٰ کے فضل سے حج 2025 کے فلائٹ آپریشن کے تحت پہلی حج پرواز لاہور انٹرنیشنل ایئرپورٹ سے 151 عازمین کو لے کر حجاز مقدس پہنچ گئی ہے۔ ان خیالات کا اظہار انہوں نے منگل کو یہاں حاجی کیمپ میں گفتگو کرتے ہوئے کیا۔ انہوں نے بتایا کہ آج رات کو دوسری فلائٹ 300 سے زائد عازمین کو لیکر حجاز مقدس روانہ ہو گی۔

انہوں نے بتایا کہ وفاقی وزیر مذہبی امور و بین المذاہب ہم آ ہنگی سردار محمد یوسف اور وفاقی سیکرٹری ڈاکٹر عطا الرحمان کے خصوصی احکامات پر عازمین کو ان کی دہلیز پر تمام سہولیات فراہم کی جا رہی ہیں۔ انہوں نے کہا کہ سیالکوٹ کے ارد گرد کے علاقوں جن میں شکر گڑھ، کشمیر، گجرات، منڈی بہا الدین اور گوجرانوالہ شامل ہیں کے حجاج کرام کو سہولت فراہم کرنے کے لیے شہر سیالکوٹ کے بالکل وسط میں موجود ایک نجی مارکی کے اندر حجاج اکرام کی سہولت کے لیے تمام تر انتظامات کیے ہیں جہاں پر 15 کے قریب مختلف بنک حجاج اکرام کو مفت بیگز بھی دے رہے ہیں جبکہ حجاج اکرام کی ویکسی نیشن کے لیے محکمہ صحت کا عملہ بھی یہاں پر موجود ہےجو حجاج اکرام کو دوائیوں کی پیکنگ سے متعلق بھی سہولت فراہم کر تے ہوئے ان کی مدد کر رہے ہیں، پولیس سمیت سول ڈیفنس ، سکائوٹس و دیگر محکموں کے اہلکار بھی یہاں موجود ہیں جو حجاج اکرام کو ہر طرح کی سہولت کی فراہمی کے لیے کوشاں ہیں۔

(جاری ہے)

انہوں نے بتایا کہ عازمین کی سہولت کے لیے پرواز سے 2 روز قبل انہیں ان کی سفری دستاویزات بھی یہاں سیالکوٹ میں ہی فراہم کی جا رہی ہیں تاکہ انہیں کوئی مشکل پیش نا آئے۔ حاجی کیمپ میں آئے عازمین نے منتظمین کی جانب سے کیے جانے والے انتظامات کو بہترین قرار دیتے ہوئے اعتماد کا اظہار کیا اور انتظامیہ کا شکریہ بھی ادا کیا کہ انہیں یہاں ہر طرح کی سہولت فراہم کی جا رہی ہے جس پر وہ انچارج حج آپریشن سیالکوٹ سمیت تمام منتظمین کے مشکور ہیں۔