وزیر اعلی خیبر پختونخوا کی زیر صدارت چار مختلف محکموں کے نئے ترقیاتی پروگرام سے متعلق الگ الگ اجلاسوں کا انعقاد

پشاور (اُردو پوائنٹ اخبارتازہ ترین - اے پی پی۔ 29 اپریل2025ء) خیبر پختونخوا حکومت نے اگلے مالی سال کے لیے ترقیاتی پروگرام کی تیاری شروع کردی ہے۔ وزیر اعلی خیبر پختونخوا علی امین گنڈاپور کی زیر صدارت منگل کے روز چار مختلف محکموں کے نئے ترقیاتی پروگرام سے متعلق الگ الگ اجلاسوں کا انعقاد کیا گیا جن میں محکمہ کھیل، اطلاعات، ریلیف اور اوقاف کے نئے ترقیاتی پروگرام شامل کرنے کے لئے مجوزہ منصوبوں پر غوروخوض کیا گیا۔

اجلاس میں متعلقہ صوبائی کابینہ اراکین کے علاوہ چیف سیکرٹری، ایڈیشنل چیف سیکرٹریز، متعلقہ محکموں کے انتظامی سیکرٹریز اور دیگر متعلقہ حکام نے شرکت کی۔ اجلاس میں ان محکموں کے جاری ترقیاتی منصوبوں پر پیشرفت کا بھی تفصیلی جائزہ لیا گیا۔ وزیر اعلیٰ نے متعلقہ حکام کو مجوزہ سالانہ ترقیاتی پروگرام کو بروقت حتمی شکل دینے کے لئے اقدامات کی ہدایت کی اور واضح کیا کہ نئے سالانہ ترقیاتی پروگرام کے لئے ضرورت کی بنیاد پر قابل عمل منصوبے تجویز کئے جائیں۔

(جاری ہے)

انہوں نے ہدایت کی کہ نئے سالانہ ترقیاتی پروگرام میں صرف ایسے منصوبے شامل کئے جائیں جو مقررہ مدت میں مکمل ہو سکیں اور ان منصوبوں سے زیادہ سے زیادہ لوگ مستفید ہوں۔ علی امین گنڈاپور کا کہنا تھا کہ ترقیاتی منصوبوں کی تکمیل میں تاخیر سے سرکاری خزانے پر اضافی بوجھ پڑ رہا ہے، اس لیے اگلے مالی سال کے بجٹ میں جاری ترقیاتی منصوبوں کی تکمیل کو ترجیح دی جائے گی۔

وزیر اعلی نے کہا کہ اگلے ترقیاتی بجٹ کا زیادہ حصہ جاری منصوبوں کی تکمیل کے لئے مختص کیا جائے گا اور تکمیل کے قریب منصوبوں کو مکمل کرنے کے لئے ان منصوبوں کو فل فنڈنگ کی جائے گی۔وزیر اعلی نے کہا کہ ترقیاتی فنڈز عوام کے ٹیکس کا پیسہ ہے اس کا دانشمندانہ اور با معنی استعمال یقینی بنایا جائے گا۔ علی امین گنڈاپور نے مزید ہدایت کی کہ مختلف محکموں کی ترقیاتی سکیموں میں ڈوپلیکیشنز کو ختم کیا جائے اور دو مختلف محکموں میں ایک ہی نوعیت کے ترقیاتی منصوبے شروع کرنے سے گریز کیا جائے۔

انہوں نے ترقیاتی منصوبے شروع کرنے سے پہلے درکار زمینوں کی دستیابی کو یقینی بنانے کی بھی ہدایت کی ہے۔ انہوں نے محکمہ منصوبہ بندی و ترقیات کو نئے سالانہ ترقیاتی پروگرام کے لئے مجوزہ منصوبوں کی فیزیبلٹی اور پبلک یوٹیلیٹی کا باریک بینی سے جائزہ لینے کی ہدایت کرتے ہوئے واضح کیا کہ نئے ترقیاتی پروگرام میں شامل کرنے کے لئے صرف ایسے منصوبوں کو حتمی شکل دی جائے جو قابل عمل ہونے کے ساتھ ساتھ زیادہ سے زیادہ آبادی کو فائدہ دے سکیں۔ وزیر اعلی کا کہنا تھا کہ اگلے مالی سال کا ترقیاتی پروگرام صوبے کی مالی استطاعت کے مطابق اور حقیقت پسندانہ انداز میں ترتیب دیا جائے گا اور تھرو فارورڈ کو کم سے کم کرنے کے لئے اقدامات کئے جائیں گے۔