آئی جی سندھ کی زیر صدارت صوبے میں منشیات مافیاز اور انکے گٹھ جوڑ کے خاتمے سے متعلق اہم جائزہ اجلاس

کراچی (اُردو پوائنٹ اخبارتازہ ترین - این این آئی۔ 30 اپریل2025ء) آئی جی سندھ غلام نبی میمن کی ذیر صدارت صوبے میں منشیات مافیاز اور انکے گٹھ جوڑ کے خاتمے سے متعلق اہم جائزہ اجلاس منعقد ہوا ۔اجلاس میں ایڈیشنل آئی جی کراچی،ڈی آئی جیز،کرائم اینڈ انویسٹی گیشنز،ہیڈ کوارٹرز،اسپیشل برانچ،سی آئی اے، انویسٹی گیشنز کراچی،آئی ٹی،زونل ڈویژنل ڈی آئی جیز، ضلعی ایس ایس پیز سمیت ایس پیز انویسٹی گیشنز نے شرکت کی۔

اجلاس کے شرکا کو ڈی آئی جی اسپیشل برانچ نے صوبے میں منشیات مافیازاور انکے گٹھ جوڑ میں ملوث ملزمان اور انکے خلاف پولیس ایکشن سے متعلق تفصیلی بریفنگ دی جبکہ اے آئی جی آپریشنز نے منشیات کی فروخت میں ملوث ہلاک،گرفتار اور مفرور ملزمان سے متعلق آگاہ کیا۔ایڈیشنل آئی جی کراچی نے بتایا کہ بیرون ملک مفرور ملزمان کے خاندان جو منشیات کی فروخت میں ملوث ہیں ان کے گرد بھی گھیرا تنگ کرنے کی ضرورت ہے۔

(جاری ہے)

منشیات مافیاز کے خلاف کاروائیوں سے ماضی میں غیر معمولی فرق/نتائج دیکھنے میں آئے ۔آئی جی سندھ نے کہا کہ منشیات مافیاز کے خلاف پولیس کریک ڈاؤن کو مزید تیز کیا جائے۔پولیس کارروائیوں کے نتائج اور منشیات مافیاز کے خلاف ایکشن عوامی اور ادارے کی سطح تک محسوس ہونا چاہیئے۔تمام ضلعی افسران آئندہ ہفتے ہونے والے اجلاس تک منشیات مافیاز،ان کے گٹھ جوڑ کے خلاف کاروائیوں اور سزاؤ ں سے متعلق اپنی رپورٹ پیش کریں گے۔

اچھی کارکردگی کا مظاہرہ کرنے پر تعریف، غیرتسلی بخش اور ناقص کارکردگی پر تحریری طور سزا دی جائے گی۔انہوں نے کہا کہ اسپیشل برانچ ، ڈی آئی جی ہیڈکوارٹرز اور اے آئی جی آپریشنز،منشیات مافیاز کی فہرست میں پولیس اسٹیشنز کی حدود کو واضح کریں۔منشیات کے کیسز کی تفتیش کے لیئے تجربہ کار اور ماہر تفتیشی افسران تعینات کرکے ٹھوس شواہد پر مبنی کیس عدالت میں پیش کیئے جائیں۔

منشیات فروشی کی فہرستوں میں شامل یا غیر شامل منشیات فروشوں کے خلاف منی لانڈرنگ کا کیس بنا کر ایف آئی اے کو ارسال کیا جائے۔آئی جی سندھ نے ہدایت کی کہ عیدالاضحی کے موقع پر فول پروف سیکورٹی پر مشتمل کنٹی جنسی پلان تشکیل دیا جائے۔15. گذشتہ سال مویشیوں کی چوری میں ملوث ملزمان کے خلاف کاروائی اور تفتیش کرکے مویشیوں کی چوری کی واردتوں کو روکا جائے۔