ہارون اختر خان سے ریونیو موبلائزیشن، سرمایہ کاری و تجارتی پروگرام کے وفد کی ملاقات،پاکستان کی آئندہ صنعتی پالیسی کے خدوخال پر تبادلہ خیال کیا

بدھ 30 اپریل 2025 22:35

اسلام آباد(اُردو پوائنٹ اخبارتازہ ترین - این این آئی۔ 30 اپریل2025ء)وزیر اعظم کے معاون خصوصی برائے صنعت و پیداوار ہارون اختر خان سے ریونیو موبلائزیشن، سرمایہ کاری اور تجارتی پروگرام کے وفد نے ملاقات کی جس میں پاکستان کی آئندہ صنعتی پالیسی کے خدوخال پر تبادلہ خیال کیا گیا۔اس موقع پرہارون اختر خان نے کہاکہ ہم ایک ایسی جامع صنعتی پالیسی متعارف کرا رہے ہیں جو صنعت کو درپیش چیلنجز سے نمٹنے کیلئے وقت کی اہم ضرورت ہے، یہ پالیسی صنعتکاروں کو تقویت دے گی اور معیشت کو پائیدار بنیادوں پر ترقی دینے میں مددگار ثابت ہو گی۔

انہوں نے واضح کیا کہ نئی صنعتی پالیسی خاص طور پر برآمدات کے فروغ اور عالمی سطح پر پاکستان کی صنعتی مسابقت کو بہتر بنانے پر مرکوز ہو گی۔ انہوں نے کہا کہ ہماری کوشش ہے کہ صنعتکاروں کے لئے سازگار ماحول پیدا کیا جائے تاکہ وہ جدید ٹیکنالوجی اور مہارتوں سے فائدہ اٹھا کر عالمی منڈیوں میں مثر انداز میں داخل ہو سکیں ۔

(جاری ہے)

انہوں نے بتایا کہ وزارتِ صنعت و پیداوار، REMITکے ساتھ قریبی مشاورت اور اشتراک سے ایک ایسی حکمت عملی ترتیب دے رہی ہے جو پاکستان کو صنعتی ترقی کی راہ پر گامزن کرے گی،یہ صنعتی پالیسی نہ صرف ملکی معیشت کو تقویت دے گی بلکہ روزگار کے مواقع میں اضافہ اور صنعتی پیداواری صلاحیت کو بھی بہتر بنائے گی۔