مزدور اور محنت کش طبقہ ہماری معیشت اور قومی ترقی کا محرک ہے، صدر اور وزیراعظم کا پیغام

اسلام آباد(اردوپوائنٹ اخبار تازہ ترین۔یکم مئی 2025)صدر مملکت آصف علی زرداری اور وزیر اعظم شہباز شریف نے مزدوروں کے عالمی دن کے موقع پر محنت کشوں کی جدوجہد اور قربانیوں کو خراج تحسین پیش کرتے ہوئے کہا ہے کہ مزدور اور محنت کش طبقہ ہماری معیشت اور قومی ترقی کا محرک ہے،مزدوروں کے عالمی د ن کے موقع پر اپنے پیغام میں ان کا کہنا ہے کہ منصفانہ لیبر ماحول تشکیل دینے اور مزدوروں کی فلاح و بہبود کیلئے کام کرنا ہو گا، آئیے ملک میں بامعنی پالیسیوں، جامع ترقی اور ایک ایسا کلچر فروغ دیں جہاں ہر محنت کش کے کردار کا احترام کیا جائے۔

صدر مملکت آصف زرداری نے عالمی یوم مزدور پر اپنے پیغام میں کہا کہ ملکی ترقی میں اہم کردار ادا کرنے والے محنت کش مرد و خواتین کی کاوشوں ، جدوجہد اور قربانیوں کو خراج تحسین پیش کرتے ہیں۔

(جاری ہے)

یومِ مزدور دنیا بھر کے محنت کشوں کی اپنے حقوق اور وقار کیلئے جدوجہد کی یاد دلاتا ہے۔ ہم مزدوروں کی خودمختاری، منصفانہ اجرت، محفوظ ماحول اور سماجی تحفظ کیلئے اپنے عزم کا اعادہ کرتے ہیں۔

وزیر اعظم شہباز شریف نے اپنے پیغام میں کہنا تھا کہ محنت کشوں کیلئے محفوظ، صحت مند اور باوقار حالات کے عزم کا اعادہ کرتے ہیں۔شہباز شریف نے کہا کہ محنت کش قوم کی ترقی اور حالات سے نمٹنے کی استعداد کے پیچھے اصل محرک ہیں۔ مزدوروں کے بنیادی حقوق کا تحفظ آئین میں درج ہے۔ مزدوروں کے تحفظ کیلئے اہم قانون سازی، انتظامی اصلاحات کی ہیں۔انہوں نے کہا کہ مزدور ہمارے بنیادی ڈھانچے کی تعمیر، صنعتوں، زراعت اور معیشت کی ترقی میں اہم کردار ادا کرتے ہیں۔

ہمارے کارکن ہمارا فخر ہیں۔ ہماری قومی ترقی محنت کشوں کی محنت اور کردار کی مرہون منت ہے۔دریں اثناءوزیراعلیٰ پنجاب مریم نوازشریف نے بھی عالمی یوم مزدور پر محنت کشوں کو خراج تحسین پیش کیا ہے۔محنت کشوں کے عالمی دن پر اپنے پیغام میں وزیراعلیٰ پنجاب مریم نواز نے ورکروں، کان کنوں اور کارکنوں کی صنعتی خدمات کو زبردست خراج تحسین کرتے ہوئے کہا ہے کہ ہرمزدور، ورکر، کان کنوں اور محنت کش کی عظمت کو سلام کرتے ہیں۔

انہوں نے کہا کہ محنت کش اللہ کا دوست ہے اور ہم اللہ تعالیٰ کے دوست کی قدر اور احترام کرتے ہیں۔ لیبر ڈے کے حوالے سے محنت کشوں کیلئے تقریباً 84 ارب روپے کا مجموعی پیکیج دیا ہے، راشن کارڈ کے ذریعے کان کن اور ورکرز تین ہزار روپے ماہانہ سبسڈی حاصل کر سکیں گے۔جے ایس بینک کارڈ کے ذریعے ورکر ڈیجیٹل کیش ٹرانسفر، ایڈوانس سیلری اور لیبر ڈے انعامات سمیت 13 دیگر فوائد حاصل کر سکیں گے۔ان کایہ بھی کہنا تھاکہ لاہور میں محنت کشوں کیلئے اپنی نوعیت کا 200 بیڈ کا پہلا جدید ترین کارڈیک سٹی بنائیں گے۔ ورکروں کو بہترین معالجین سے علاج کی سہولت فراہم کرنے کیلئے ٹیلی کلینکس بنا رہے ہیں۔ ٹیکسلا میں لیبر کالونی اور سندر سٹیٹ میں ورکر ویلفیئرکمپلیکس کا افتتاح خوش آئند ہے۔