عالمی یوم مزدور، مریم نوازشریف کا محنت کشوں کو خراج تحسین

جمعرات 1 مئی 2025 13:35

لاہور (اُردو پوائنٹ اخبارتازہ ترین - این این آئی۔ 01 مئی2025ء) وزیراعلیٰ پنجاب مریم نوازشریف نے عالمی یوم مزدور پر محنت کشوں کو خراج تحسین پیش کیا ہے۔محنت کشوں کے عالمی دن پر اپنے پیغام میں وزیراعلی پنجاب مریم نواز نے ورکروں، کان کنوں اور کارکنوں کی صنعتی خدمات کو زبردست خراج تحسین کرتے ہوئے کہا ہے کہ ہرمزدور، ورکر، کان کنوں اور محنت کش کی عظمت کو سلام کرتے ہیں۔

انہوں نے کہا کہ محنت کش اللہ کا دوست ہے اور ہم اللہ تعالی کے دوست کی قدر اور احترام کرتے ہیں، لیبر ڈے کے حوالے سے محنت کشوں کے لئے تقریبا 84ارب روپے کا مجموعی پیکیج دیا ہے، راشن کارڈ کے ذریعے کان کن اور ورکرز تین ہزار روپے ماہانہ سبسڈی حاصل کر سکیں گے، جے ایس بینک کارڈ کے ذریعے ورکر ڈیجیٹل کیش ٹرانسفر، ایڈوانس سیلری اور لیبر ڈے انعامات سمیت 13دیگر فوائد حاصل کر سکیں گے۔

(جاری ہے)

ان کا کہنا تھا کہ قصور اور سرگودھا میں 50،50بیڈز کے سوشل سکیورٹی ہسپتالوں کے افتتاح پر مزدوروں کو مبارکباد پیش کرتی ہوں، مزدوروں کیلئے رحیم یارخان میں 50بیڈ کا سوشل سکیورٹی ہسپتال بنائیں گے، ورکرز کیلئے تین شہروں میں سٹیٹ آف دی آرٹ ویلنس سنٹر بنائیں گے۔مریم نواز نے کہا کہ لاہور میں محنت کشوں کے لئے اپنی نوعیت کا 200بیڈ کا پہلا جدید ترین کارڈیک سٹی بنائیں گے، ورکروں کو بہترین معالجین سے علاج کی سہولت فراہم کرنے کیلئے ٹیلی کلینکس بنا رہے ہیں، ٹیکسلا میں لیبر کالونی اور سندر سٹیٹ میں ورکر ویلفیئرکمپلیکس کا افتتاح خوش آئند ہے۔

وزیراعلی پنجاب کا کہنا تھا کہ واربرٹن میں نئی لیبر کالونی اور ملتان میں فیز ٹو بنائیں گے، فیکٹریوں میں خواتین ورکرز کی سہولت کیلئے 300 ڈے کیئر سنٹر بنا رہے ہیں، پہلی مرتبہ صوبہ بھر میں کم از کم اجرت کی ادائیگی یقینی بنائی جا رہی ہے، محنت کش بھائیوں کی عظمت کو سلام، ورکروں کے بغیر کوئی بھی قوم ترقی کی منزلیں طے نہیں کر سکتی۔

Facebook Twitter Google + Share on Whatsapp

عالمی یوم مزدور، مریم نوازشریف کا محنت کشوں کو خراج تحسین

متعلقہ عنوان :

مزید اہم خبریں