Live Updates

نوازشریف نے عمران خان اور سب کیلئے کیلئے ہمیشہ معاملہ فہمی اورعزت واحترام کا رویہ اپنایا

نوازشریف بطور وزیراعظم ان کے گھر بھی چل کر گئے تھے، لیکن دوسری طرف بات معاملہ فہمی کے امکانات بہت کم ہیں، 2019 میں بھی پوری قوم متحد تھی، لیکن تب بھی وزیراعظم اپوزیشن کے ساتھ نہیں بیٹھے تھے۔ وفاقی مشیر رانا ثناء اللہ کی گفتگو

ثنااللہ ناگرہ جمعہ 2 مئی 2025 22:04

نوازشریف نے عمران خان اور سب کیلئے کیلئے ہمیشہ معاملہ فہمی اورعزت واحترام ..

اسلام آباد ( اردوپوائنٹ اخبار تازہ ترین۔ آئی پی اے ۔02 مئی 2025ء ) وفاقی مشیر سیاسی امور رانا ثناء اللہ نے کہا ہے کہ نوازشریف نے عمران خان اور سب کیلئے کیلئے ہمیشہ معاملہ فہمی اورعزت واحترام کا رویہ اپنایا،نوازشریف بطور وزیراعظم ان کے گھر بھی چل کر گئے تھے، لیکن دوسری طرف بات معاملہ فہمی کے امکانات بہت کم ہیں۔ انہوں نے سماء نیوز کے پروگرام میں گفتگو کرتے ہوئے کہا کہ بھارت پہلگام واقعے سے چیزیں واضح ہوگئیں کہ بھارت نے سب کچھ منصوبہ بندی کے تحت کیا۔

پاکستان نے پہلگام واقعے کی بھرپور الفاظ میں مذمت کی ہے، پاکستان کو کسی بھی شکل میں دہشتگردی قابل قبول نہیں ہے۔ بھارت سندھ طاس معاہدے کو ختم کرنا چاہتا ہے، بھارت چاہتا ہے کہ مقبوضہ کشمیر میں عوام پر مزید ظلم کرسکے۔

(جاری ہے)

اسی طرح انڈیا چاہتا کہ پاکستان کو معاشی طور پر بدحال رکھا جائے۔ وہ چاہتا ہے کہ پاکستان ایسی صورت میں رہے جس طرح پچھلے دو تین سال ڈیفالٹ کی کوشش ہوتی رہی۔

رانا ثناء اللہ نے کہا کہ پاکستان کی جنگی تیاری دفاع کیلئے ہے، لیکن انڈیا سمیت پوری دنیا کو یقین دہانی کرائی ہم پہل نہیں کریں گے، لیکن ہم یہ عہد بھی کرتے ہیں اگر بھارت نے کوئی ایڈونچر کیا تو بھرپور جواب دیں گے۔انڈیا کی طرف سے ایسا کوئی بیان نہیں آیا،اطلاعات ہیں کہ بھارت مدارس کو نشانہ بنا سکتا ہے۔ انڈیا تاحال دنیا کو یقین دہانی نہیں کرائی کہ ہم کوئی ایڈونچر نہیں کریں گے ، جب تک انڈیا مہم جوئی نہ کرنے کی یقین دہانی نہیں کراتا، ہم موجودہ سکیورٹی اور آپریشنل صورتحال کو برقرار رکھیں گے۔

نیشنل سکیورٹی کمیٹی نے کہا کہ اگر سندھ طاس معاہدے کی خلاف ورزی کی گئی، تو وہ جنگ تصور کی جائے گی، پاکستان کا پانی روکنے کیلئے جو بھی اسٹرکچر بنایا جائے گا اس کو ٹارگٹ کریں گے۔ اس پر نیشنل سکیورٹی کمیٹی کا فیصلہ ہوچکا ہے۔پاکستان نے بیانیئے کی جنگ میں بھارت کو آؤٹ کلاس کردیا ہے۔انہوں نے کہا کہ نوازشریف کی طرف سے عمران خان کیلئے ہمیشہ عزت واحترام کا رویہ اپنایا گیا، نوازشریف بطور وزیراعظم ان کے گھر بھی چل کر گئے تھے، سانحہ اے پی ایس ہوا تو نوازشریف نے عمران خان کو خود شرکت کی دعوت دی۔لیکن دوسری طرف بات چیت کے امکانات بہت کم ہیں۔ 2019کو جب واقعہ تو پوری قوم متحد تھی، لیکن اس وقت کے وزیراعظم اپوزیشن کے ساتھ نہیں بیٹھے تھے۔