راولپنڈی ،تیز آندھی کے ساتھ بارش، عمارتوں کے شیشے ٹوٹ گئے، میٹرو بسیں روک دی گئیں

گرمی کا زور ٹوٹنے سے شہریوں نے سکھ کا سانس لیا، تفریح کیلئے باہرنکل آئے

جمعہ 2 مئی 2025 03:50

راولپنڈی (اُردو پوائنٹ اخبارتازہ ترین - این این آئی۔ 02 مئی2025ء)راولپنڈی میں تیز آندھی کیساتھ بارش کے باعث عمارتوں کے شیشے ٹوٹ گئے جبکہ میٹرو بسیں روک دی گئیں۔ تفصیلات کے مطابق جمعرات کی شام راولپنڈی اور جڑواں شہراسلام آباد میں کالی گھٹائوں سے دن میں اندھیرا چھا گیا، مختلف علاقوں میں گرد آلود تیز ہوائیں چلنے سے کئی مقامات پر درخت جڑوں سے اکھڑ گئے۔

طوفان بادوباراں اس قدر شدید تھا کہ انتظامیہ کو جڑواں شہروں میں میٹرو بس سروس بند کرنا پڑی جبکہ شہر بھر میں ٹریفک کی روانی بھی متاثر ہوئی۔راولپنڈی میں گردوغبار کے طوفان کے ساتھ ہی بجلی غائب ہوگئی ہے جس سے شہریوں کو پریشانی کا سامنا ہے۔شہری ژالہ باری کے خوف سے محفوظ پناہ گاہوں کے متلاشی رہے، گرج چمک آندھی اور بارش کے ساتھ ہی مری روڈ پر ٹریفک کم ہوگئی ۔

(جاری ہے)

راولپنڈی اور گردونواح میں بارش سے موسم خوشگوار ہو گیا، گرمی کا زور ٹوٹنے سے شہریوں نے سکھ کا سانس لیا،شہری تفریح کیلئے باہرنکل آئے۔خان پور میں بھی تیز آندھی کے ساتھ بارش ہوئی ،ٹیکسلا خان پور روڈ پر بھاری درخت اور بجلی کے پول گرنے سے دونوں اطراف ٹریفک جام ہوگئی ،مختلف علاقوں میں بجلی کی سپلائی بھی معطل ہوگئی۔ترجمان واسا کے مطابق راولپنڈی ہائی الرٹ ہے ، رین ایمرجنسی نافذ اور عملہ ہیوی مشینری کے ساتھ فیلڈ میں موجود ہے اور کسی بھی قسم کی ایمرجنسی سے نپٹنے کیلئے تیارہیں۔

ایم ڈی واسا کے مطابق نالہ لئی کی مانیٹرنگ کی جارہی ہے، ابھی نالہ لئی میں پانی کا بہا معمول کے مطابق ہے۔ترجمان واسا کے مطابق سیدپور کے مقام 8ملی میٹر ، گولڑہ 7، شمس آباد پر 8، شمس آباد 6، کچہری اور چکلالہ 5ملی میٹر بارش ریکارڈ کی گئی۔