مظفرآباد، بھارت کے اسرائیلی طرز پر کشمیریوں پر ڈھائے جانے والے مظالم کے خلاف احتجاجی ریلی

مظفراباد (اُردو پوائنٹ اخبارتازہ ترین - این این آئی۔ 02 مئی2025ء)کل جماعتی حریت کانفرنس آزاد جموں و کشمیر شاخ کے زیر اہتمام بھارت کی طرف سے مقبوضہ کشمیرمیں جاری انسانی حقوق کی پامالیوں اوراسرائیلی طرز پر کشمیریوں کے قتل عام کے خلاف مظفرآباد میں ایک احتجاجی ریلی نکالی گئی۔کشمیرمیڈیاسروس کے مطابق ریلی کی قیادت حریت کانفرنس کے کنوینئر غلام محمد صفی نے کی۔

ریلی میں مظفرآباد کی سیاسی، سماجی، مذہبی شخصیات اور جموں و کشمیر سے تعلق رکھنے والے مہاجرین کی کثیر تعداد نے شرکت کی۔شرکا نے دنیا کی توجہ مقبوضہ کشمیر میں بھارت کی طرف سے اسرائیلی طرز پر کشمیریوں کے قتل عام ، گھروں کو مسمارکرنے اور انسانی حقوق کی پامالیوں کی جانب مبذول کرائی اور اقوام متحدہ پر دیرینہ تنازعہ کشمیر کے منصفانہ حل پر زوردیا۔

(جاری ہے)

غلام محمد صفی نے اپنے خطاب میں کہا کہ بھارت مقبوضہ کشمیر میں نہتے کشمیریوں کو وحشیانہ ظلم وتشددکانشانہ بنارہاہے ۔ گھروں کو تباہ ، نوجوانوں کو دوران حراست لاپتہ کیا جارہا ہے، حریت قیادت کو قید کرکے سیاسی خلا پیدا کیا جارہا ہے اور حق خودارادیت کی جدوجہد کو طاقت کے زور پر کچلنے کی کوشش کی جا رہی ہے۔ انہوں نے بھارت میں زیر تعلیم کشمیری طلبا کو ہراساں کیے جانے، ان پر تشدداورتعلیم ترک کرنے پر مجبور کیا جارہا ہے ۔

انہوں نے کہا کہ بھارتی حکومت دانستہ طور پر کشمیری نوجوانوں کو تعلیمی، سماجی اور معاشی طورپر مفلوج کررہی ہے تاکہ ان کے جذبہ حریت کوکمزور کیاجاسکے ۔ریلی کے شرکاء نے عالمی برادری، اقوام متحدہ اور انسانی حقوق کی عالمی تنظیموں سے مطالبہ کیا کہ وہ مقبوضہ کشمیر میں بھارتی ریاستی دہشتگردی کا نوٹس لیں اورکشمیریوں پر76سال سے جاری بھارتی مظالم بند کرائیں ۔

انہوں نے بھارت کو انصاف کے کٹہرے میں کھڑا کرنے ، کشمیریوں کوانکا پیدائشی حق خودارادیت دلوانے اور غیر قانوی طورپر نظربند کشمیری حریت قیادت کو فوری رہا ئی پر زوردیا۔ انہوں نے تنازعہ کشمیر کے حل کیلئے مزید دس جنگیں لڑنے سے پاکستان کے آرمی چیف کے بیان کا خیرمقدم کیا ۔ انہوں نے کہا کہ بھارت پاکستان کو سفارتی محاذ پر تنہا کرنے کی ہرممکن کوشش کی لیکن مملکت پاکستان کی کامیاب ڈپلومیسی نے بھارت کے مذموم عزائم کو خاک میں ملا دیا ۔

انہوں نے کہا کہ پہلگام واقعے کے بعد بھارت کی طرف سے پاکستان کے خلاف کھولے گئے محاذ کا پاکستانی عوام، میڈیا، سیاسی، سماجی، مذہبی، معاشی اور معاشرتی اکابرین نے بھرپور جواب دیا اوربھارتی پروپیگنڈے کو دنیا کے سامنے بے نقاب کردیا ہے۔ غلام محمد صفی نے جدوجہد آزادی کشمیر کو اس کے منطقی انجام تک جاری رکھنے کے کشمیریوں کے عزم کا اعادہ کیا ۔

ریلی کے شرکا میں کمشنر مظفرآباد چوہدری گفتار، کشمیری حریت رہنماء ایڈوکیٹ پرویز احمد، شیخ عبدالماجد، عزیز احمد غزالی، مشتاق السلام، سید منظور احمد شاہ، محمد اشرف ڈار، شیخ عبد المتین، زاہد اشرف، منظور احمد ڈار، عبدالمجید لون، سید گلشن، چوہدری شاہین اقبال، مشتاق حسین، زاہد صفی، نذیر کرنائی، عبدالمجید میر، شوکت نواز میر، قاری روحیل ، نسیم امتیاز، قاضی سہیل اوردیگر شامل تھے۔ریلی کے اختتام پر شہدائے کشمیر کی بلندی درجات اورمقبوضہ کشمیر کی آزادی کے لئے خصوصی دعا کی گئی۔