پنجاب بھر میں گرج چمک کے ساتھ طوفانی بارشوں کا امکان

بارشوں کا یہ سلسلہ4 مئی تک جاری رہے گا، موجودہ موسمی صورتحال میں آسمانی بجلی گرنے کے خدشات بھی بڑھ گئے

جمعہ 2 مئی 2025 23:35

پنجاب بھر میں گرج چمک کے ساتھ طوفانی بارشوں کا امکان

لاہور (اُردو پوائنٹ اخبارتازہ ترین - اے پی پی۔ 02 مئی2025ء) پنجاب بھر میں آئندہ دنوں کے دوران گرج چمک کے ساتھ طوفانی بارشوں کا امکان ظاہر کیا گیا ہے۔ترجمان پراونشل ڈیزاسٹر مینجمنٹ اتھارٹی (پی ڈی ایم اے) کے مطابق بارشوں کا یہ سلسلہ4 مئی تک جاری رہے گا جبکہ موجودہ موسمی صورتحال میں آسمانی بجلی گرنے کے خدشات بھی بڑھ گئے ہیں۔ڈی جی پی ڈی ایم اے عرفان علی کاٹھیا نے شہریوں کو خبردار کیا ہے کہ وہ خراب موسم کے دوران کھلے آسمان تلے جانے سے گریز کریں اور آسمانی بجلی سے بچائو کیلئے محفوظ مقامات پر رہیں۔

انہوں نے کہا کہ آئندہ تین روز انتہائی احتیاط کی ضرورت ہے۔گزشتہ شب آنے والے آندھی اور طوفان کے باعث 2 شہری جاں بحق اور24 زخمی ہو گئے جبکہ9 عمارتوں کو جزوی نقصان پہنچا۔

(جاری ہے)

ڈی جی پی ڈی ایم اے نے زخمی افراد کو فوری اور موثر طبی امداد فراہم کرنے کی ہدایت جاری کر دی ہے۔پی ڈی ایم اے کے مطابق پنجاب کے مختلف ڈویژنز جن میں راولپنڈی، گوجرانوالا، لاہور، فیصل آباد، سرگودھا، ڈی جی خان، ملتان، ساہیوال اور بہاولپور شامل ہیں،بارشوں کی لپیٹ میں رہیں گے۔

مری اور گلیات میں لینڈ سلائیڈنگ کے امکانات بھی موجود ہیں۔ریسکیو ٹیموں اور ضلعی انتظامیہ کو الرٹ کر دیا گیا ہے تاکہ کسی بھی ہنگامی صورتحال سے فوری طور پر نمٹا جا سکے۔ ترجمان پی ڈی ایم اے نے شہریوں سے اپیل کی ہے کہ کسی بھی ایمرجنسی کی صورت میں پی ڈی ایم اے کی ہیلپ لائن 1129 پر فوری رابطہ کریں۔ڈی جی پی ڈی ایم اے نے کہاکہ حکومت پنجاب کی پالیسی کے تحت متاثرہ خاندانوں کی مالی معاونت یقینی بنائی جائے گی اور موسمی حالات کی مسلسل نگرانی کی جا رہی ہے تاکہ شہریوں کی جان و مال کو محفوظ رکھا جا سکے۔