Live Updates

وزیر اطلاعات اور ڈی جی آئی ایس پی آر(آج)سیاسی رہنماؤں کو بریفنگ دیں گے

ہفتہ 3 مئی 2025 21:55

اسلام آباد(اُردو پوائنٹ اخبارتازہ ترین - این این آئی۔ 03 مئی2025ء)وفاقی وزیر اطلاعات عطا تارڑ اور ڈی جی آئی ایس پی آرلیفٹیننٹ جنرل احمد شریف چوہدری (آج)اتوارکو سیاسی جماعتوں کے رہنماؤں کو بریفنگ دیں گے۔وزارت اطلاعات کے مطابق سیاسی رہنماؤں کو دفاعی تیاریوں، سفارتی اقدامات اور ریاستی موقف سے آگاہ کیا جائے گا۔

(جاری ہے)

دوسری جانب وزارت اطلاعات نے کہاہے کہ پاکستانی اور بین الاقوامی میڈیا کو لائن آف کنٹرول (ایل او سی)کا دورہ کروایا جائے گا، دورے کا مقصد بھارت کے خیالی دہشت گردی کے کیمپس کے من گھڑت پروپیگنڈے کو بے نقاب کرنا ہے۔

وزارت اطلاعات نے کہاکہ بھارت کی جانب سے ایل او سی پر دہشت گردوں کے مبینہ ٹھکانوں کا من گھڑت پروپیگنڈا کیا جاتا رہا ہے، میڈیا کو ان مقامات پر لے جایا جائے گا جن کا جھوٹا پروپیگنڈا بھارت کرتا ہے۔پاکستانی اور بین الاقوامی میڈیا کو حقائق سے آگاہ کیا جائے گا، پاکستان پوری دنیا میں کسی بھی طرح کی دہشت گردی کی حمایت نہیں کرتا، پاکستان کسی بھی طرح کے دہشت گردانہ اقدامات کی حمایت نہیں کرتا۔وزارت اطلاعات و نشریات نے کہاکہ پاکستان پر بھارت کی جانب سے کسی بھی جارحیت کا منہ توڑ جواب دیا جائے گا۔