پاکستان کی درخواست پر اقوام متحدہ سلامتی کونسل کا ہنگامی اجلاس طلب

مستقل مندوب عاصم افتخار بھارتی جارحیت پر اقوام عالمی برادری کو بریفنگ دیں گے امریکی انتظامیہ میں بھی معاملے پر تشویش پائی جاتی ہے، امریکہ کا سلامتی معاملات میں ایک نمایاں کردار ہے، توقع ہے واشنگٹن کشیدگی کے خاتمے میں کردار ادا کرے گا. پاکستانی سفیر رضوان سعید

میاں محمد ندیم پیر 5 مئی 2025 14:02

پاکستان کی درخواست پر اقوام متحدہ سلامتی کونسل کا ہنگامی اجلاس طلب

نیویارک(اردوپوائنٹ اخبارتازہ ترین-انٹرنیشنل پریس ایجنسی۔ 05 مئی ۔2025 )پاکستان کی درخواست پر اقوام متحدہ کی سلامتی کونسل کا ہنگامی اجلاس طلب کر لیا گیا جس میں پاکستان عالمی برادری کو بھارت کی اشتعال انگیزی اور خطے میں امن کو لاحق خطرات سے آگاہ کرے گا. اجلاس میں اقوام متحدہ میں پاکستان کے مستقل مندوب عاصم افتخار بھارتی جارحیت پر بریفنگ دیں گے پاکستانی مندوب عاصم افتخار نے تصدیق کی ہے کہ وزیر خارجہ اسحاق ڈار کی ہدایت پر سلامتی کونسل کی صدارت کو اجلاس بلانے کی باضابطہ اطلاع دی گئی تھی عاصم افتخار نے کہا کہ ہم اس ہدایت کے مطابق کام کر رہے ہیں اور اپیلیں جب سسٹم میں آتی ہیں تو ان کا اثر عالمی نظام پر پڑتا ہے.

(جاری ہے)

قوام متحدہ میں ہونے والے اہم اجلاس میں پاکستان عالمی طاقتوں کو ثبوتوں کے ساتھ بھارت کی علاقائی پالیسیوں کو بے نقاب کرے گا اور یہ باور کروائے گا کہ مسئلہ کشمیر کا پائیدار اور منصفانہ حل ہی جنوبی ایشیا میں دیرپا امن کی ضمانت ہے. ادھرامریکہ میں پاکستان کے سفیر رضوان سعید نے کہا ہے کہ امریکی انتظامیہ میں بھی اس معاملے پر تشویش پائی جاتی ہے کیونکہ سب جانتے ہیں کہ جنوبی ایشیا میں پیدا ہونے والی کشیدہ صورتحال کبھی محدود نہیں رہتی.

ان کا کہنا تھا کہ امریکہ کا سلامتی معاملات میں ایک نمایاں کردار ہے اور ہمیں توقع ہے کہ وہ کشیدگی کے خاتمے میں کردار ادا کرے گا دوسری جانب برطانیہ میں پاکستانی ہائی کمشنر ڈاکٹر فیصل نے ایک بیان میں کہا ہے کہ اصل مسئلہ پہلگام یا پلوامہ نہیں، بلکہ جموں و کشمیر ہے جب تک اس مسئلے کا حل کشمیریوں کی امنگوں کے مطابق نہیں نکالا جاتا، تب تک پاک بھارت تعلقات میں امن کا خواب شرمندہ تعبیر نہیں ہو سکتا.