ڈویڑنل کمشنر حیدرآباد کی زیر صدارت نئی گاج ڈیم منصوبے سے متعلق ترقیاتی کاموں اوزمین کے حصول کا جائزہ لینے کیلئے اجلاس کا انعقاد

حیدرآباد (اُردو پوائنٹ اخبارتازہ ترین - اے پی پی۔ 05 مئی2025ء) ضلع دادو میں نئی گاج ڈیم منصوبے سے متعلق ترقیاتی کاموں، زمین کے حصول اور سکیورٹی اقدامات کا جائزہ لینے کے لیے ڈویژنل کمشنر حیدرآباد بلاول احمد میمن کی زیر صدارت ایک اہم جائزہ اجلاس ان کے دفتر شہباز بلڈنگ حیدرآباد میں منعقد ہوا۔ اجلاس میں چیف انجینئر و پراجیکٹ ڈائریکٹر آر بی او ڈی نئی گاج ڈیم، اے ڈی سی ون، ایس ایس پی دادو، محکمہ آبپاشی افسران دادو، محکمہ پراونشل ہائی ویز اور ضلعی انتظامیہ دادو کے افسران نے شرکت کی۔

اجلاس میں چیف انجینئر اینڈ پروجیکٹ ڈائریکٹر نئی گاج ڈیم نے منصوبے کی تازہ ترین پیش رفت سے آگاہ کیا اورزمین کے حصول میں درپیش رکاوٹوں پر روشنی ڈالی۔بریفنگ دیتے ہوئے مزید چیف انجینئر نئی گاج ڈیم نے بتایا کہ منصوبے کے راستے میں آنے والی 295 ایکڑ نجی اراضی کی خریداری کے لیے بجیٹ کی منظوری درکار ہے۔

(جاری ہے)

ڈویژنل کمشنرحیدرآباد نے اس موقع پر بتایا کہ متعلقہ زمین کا سروے مکمل ہو چکا ہے اور جلد ہی ایوارڈ جاری کر کے زمین مالکان کو واجب الادا رقم ادا کر دی جائے گی۔

انہوں نے مزید کہا کہ مقامی آبادی کی تعداد محدود ہے لہٰذا اس زمین کی نگرانی محکمہ آبپاشی کو سونپی جائے گی۔ کمشنر نے ہدایت دی کہ زمین کے حصول اور متاثرین کی بحالی کا عمل شفاف طریقے سے مکمل کیا جائے اور جن افراد کی زمین یا تعمیرات منصوبے کی زد میں آئیں انہیں جدید طرز کے متبادل مکانات فراہم کیے جائیں۔مقامی آبادی کی بحالی کے عمل میں شفافیت کو یقینی بنانے کے لیے ڈویژنل کمشنر حیدرآباد نے متعلقہ محکموں کو ہدایت دی کہ ایک مشترکہ کمیٹی تشکیل دی جائے جس میں تمام متعلقہ فریقین اور غیر سرکاری تنظیموں کو شامل کیا جائے تاکہ زمین کے حصول اور متاثرہ افراد کی منتقلی میں کسی قسم کی کوتاہی نہ ہوسکے۔

اجلاس میں ورکس اینڈ سروسز ڈپارٹمنٹ کے پرونشنل ہائی ویز ڈویژن دادو افسران نے آگاہ کیا کہ ڈیم کے گرد سڑکوں کی تعمیر کے لیے مزید بجٹ درکار ہے۔ ڈویژنل کمشنر حیدرآبادبلال احمد میمن نے متعلقہ افسران کو ہدایت دی کہ تعمیراتی کاموں کا مکمل تخمینہ مرتب کر کے ڈپٹی کمشنر دادو کے تعاون سے لائحہ عمل تیار کریں تاکہ بجٹ کی منظوری کے لیے یہ معاملہ چیف سیکرٹری سندھ کے سامنے پیش کیا جا سکے۔

علاوہ ازیں ڈویژنل کمشنر حیدرآباد نے ایس ایس پی دادو کو نئی گاج ڈیم کی سکیورٹی کے حوالے سے 5سالہ جامع منصوبہ تیار کرنے، سکیورٹی یونٹ کے قیام، کیمروں کی انسٹالیشن، گاڑیوں اور دیگر ضروری وسائل کی فراہمی کے لیے تخمینہ فراہم کرنے کی ہدایت کی۔بلال احمد میمن کا کہنا تھا کہ نئی گاج ڈیم آئندہ تقریباً تین سالوں میں مکمل فعال ہوجائے گا جس کے بعد نئی گاج ڈیم سے متعلقہ زمینوں کو زراعت کے لیے پانی کی فراہمی ممکن ہو سکے گی۔

چیف انجینئر نئی گاج ڈیم نے یقین دہانی کرائی کہ کمانڈ ایریا کے ترقی کا کام 6ماہ سے ایک سال کے اندر مکمل کر لیا جائے گا۔کمشنر بلاول احمد میمن نے اجلاس کے اختتام پر کہا کہ نئی گاج ڈیم کا مقصد ناصرف زراعت کو فروغ دینا بلکہ اس سے علاقے میں معاشی بہتری، مواصلاتی ترقی اور قدرتی وسائل کے موثر استعمال کی راہ بھی ہموار ہوگی۔