چیئرمین اے پی ایس ای اے کی وزیر تجارت سے ملاقات، مقامی آئل سیڈز کی پیداوار بڑھانے کیلئے ٹیرف میں تبدیلیوں پر گفتگو

منگل 6 مئی 2025 17:44

اسلام آباد (اُردو پوائنٹ اخبارتازہ ترین - این این آئی۔ 06 مئی2025ء)آل پاکستان سالونٹ ایکسٹریکٹرز ایسوسی ایشن (APSEA) کے چیئرمین زین محمود نے اپنی ٹیم کے ہمراہ وفاقی وزیر تجارت جام کمال خان سے ملاقات کی۔ ملاقات میں سویابین اور کینولا کی درآمدات پر ٹیرف میں تبدیلی کے ذریعے مقامی پیداوار کو فروغ دینے پر تبادلہ خیال کیا گیا۔وزیرِ اعظم کے معاون خصوصی برائے تجارت رانا احسان افضل اور سیکرٹری تجارت جواد پال بھی اس موقع پر موجود تھے۔

زین محمود نے مقامی کسانوں کے تحفظ اور ان کی حوصلہ افزائی کے لیے ٹیرف اسٹرکچر میں مناسب تبدیلیوں کی اہمیت پر زور دیا۔ انہوں نے کہا کہ ٹیرف میں اصلاحات سے پاکستان میں آئل سیڈز کی کاشت اور پروسیسنگ کو فروغ ملے گا، جس سے درآمدات پر انحصار کم ہو گا اور خود انحصاری کو فروغ حاصل ہو گا۔

(جاری ہے)

چیئرمین اے پی ایس ای اے نے سورج مکھی، سویابین اور کینولا سمیت مختلف آئل سیڈز کی پیداوار بڑھانے کے لیے متعدد تجاویز بھی پیش کیں تاکہ ملکی درآمدی بل میں کمی لائی جا سکے اور مقامی صنعت کو مزید مؤثر بنایا جا سکے۔

وفاقی وزیر تجارت جام کمال خان نے وفد کو حکومت کی مکمل حمایت کا یقین دلایا۔ انہوں نے اس عزم کا اعادہ کیا کہ وزارت تجارت ایسی پالیسیوں کو فروغ دے گی جو مقامی زرعی ویلیو چین اور صنعتی ترقی کے لیے مددگار ثابت ہوں۔یہ ملاقات حکومت کی صنعت سے وابستہ اسٹیک ہولڈرز کے ساتھ پالیسی سازی میں مشاورت کے جاری عمل کی عکاسی کرتی ہے۔