بانی پی ٹی آئی معاف کرنے اور مذاکرات کے لیے تیار ہیں، علی امین گنڈا پور

بدھ 14 مئی 2025 22:29

اسلام آباد (اُردو پوائنٹ اخبارتازہ ترین - آن لائن۔ 14 مئی2025ء)اسلام آباد ہائی کورٹ کے باہر میڈیا سے گفتگو کرتے ہوئیوزیراعلیٰ خیبرپختونخوا نے کہاہے کہ بانی پی ٹی آئی معاف کرنے اور مذاکرات کے لیے تیار ہیں، موجودہ سیاسی عدم استحکام اور معاشی بحران ملک کو نقصان پہنچا رہا ہے۔ انہوں نے کہا کہ پیرول رہائی کے لیے بھی درخواست زیر سماعت ہے، اور تمام آئینی راستے اپنائے جا رہے ہیں۔

وزیراعلیٰ خیبرپختونخوا علی امین گنڈاپور نے بانی پی ٹی آئی سے ملاقات نہ ہونے پر شدید ردعمل دیتے ہوئے کہا ہے کہ ہر ہفتے ملاقات کا عدالتی حکم موجود ہے، لیکن اس پر عمل نہیں ہو رہا۔ ان کا کہنا تھا کہ بجٹ قریب ہے، سیکیورٹی اور دیگر اہم معاملات پر بانی پی ٹی آئی سے مشاورت ضروری ہے، ملاقات سے روکنا بہت بڑی زیادتی ہے۔

(جاری ہے)

انہوں نے کہا کہ بجٹ آنے والا ہے اور اس کے لئے پارٹی کے سربراہ سے ملاقات ضروری ہے، بجٹ میں ان کے ویڑن کے لئے ان سے ملاقات ہونی چاہئے ،ہمیں ملنے نہیں دیا جا رہا،پوری قوم جانتی ہے کہ بانی پی ٹی آئی کے ساتھ ذاتیات کی جا رہی ہیں، جو لوگ ہٹ دھرمی کر کے انا کا مسئلہ بنا رہے ہیں وہ پاکستان کو نقصان پہنچا رہے ہیں، ملک میں الیکشن چوری ہوا، پارٹی رہنماوں اور ورکرز پر تشدد کیا گیا ملک میں انصاف نہیں مل رہا، ملک میں سیاسی استحکام نہ ہونے سے سرمایہ کاری نہیں آرہی بانی پی ٹی آئی کے دور میں دہشت گردی کم تھی، پی ڈیٰ ایم کے دور میں دہشت گردی میں اضافہ ہوا۔