پنجاب یونیورسٹی وائس چانسلر کا شعبہ جاتی ایلومینائی انڈوومنٹ فنڈ قائم کرنے کا اعلان

لاہور (اُردو پوائنٹ اخبارتازہ ترین - آن لائن۔ 06 مئی2025ء) وائس چانسلر پنجاب یونیورسٹی پروفیسر ڈاکٹر محمد علی نے کہا ہے کہ یونیورسٹی کے ہر شعبے میں ایلومینائی اینڈوومنٹ فنڈ بنائیں گے تاکہ مستحق طلبائو طالبات کی سکالرشپس کے ذریعے مالی امداد ممکن ہو سکے۔ وہ پنجاب یونیورسٹی کالج آف فارمیسی کے زیر اہتمام11ویںجلسہ تقسیم اسناد سے خطاب کررہے تھے۔

اس موقع پر ڈائریکٹر جنرل پنجاب ایگریکلچرفوڈاینڈ ڈرگ اتھارٹی لاہورڈاکٹرطلعت نصیرپاشا ، پرووائس چانسلر پروفیسر ڈاکٹر خالد محمود، ڈین فیکلٹی آف فارمیسی پروفیسر ڈاکٹر محمد سلیم، پرنسپل کالج آف فارمیسی پروفیسرڈاکٹر سید عاطف رضا، فیکلٹی ممبران ،فارماسیوٹیکل انڈسٹری کے نمائندگان ، طلباؤ طالبات اور ان کے والدین نے بڑی تعداد میں شرکت کی۔

(جاری ہے)

اپنے خطاب میںپروفیسر ڈاکٹر محمد علی نے کہا کہ فارمیسی کے شعبے میں بڑے نام پنجاب یونیورسٹی سے وابستہ ہیں۔انہوں نے کہا کہ ہمیں اپنے معاملات خود ٹھیک کرنے ہیں، کوئی اورنہیں کرے گا۔انہوں نے کہا کہ ہمیں فیصلہ کرنا ہے کہ تعلیم کو کس مقصد کے لئے استعمال کرنا ہے۔انہوں نے کہا کہ کانووکیشن ایک اچھی روایت ہے جو طلبائوطالبات کی کامیابی کا اعتراف ہے ،جس میں والدین کا اہم کردار ہے۔

انہو ں نے کہا کہ والدین کو آپ سے غرض کوئی نہیں، اب آپ پروقت ہے ان کی خدمت کریں۔ انہوں نے کہا کہ عملی میدان میں وہی طلبائوطالبات کامیاب ہوں گے جنھیں خودپراعتماد ہوگا۔ انہوں نے کہا کہ طلباء کو اپنے اہداف کے حصول کے لئے محنت کرنا پڑے گی۔ انہوں نے کہا کہ طلبائو طالبات کا بہتر مستقبل پاکستان میںہے۔پاکستان میں فارمیسی کے شعبے میں پنجاب یونیورسٹی کالج آف فارمیسی کا اہم کردار ہے۔

انہوں نے ڈگری ومیڈلز حاصل کرنے والے طلبائوطالبات اوران کے والدین و اساتذہ کو مبارک باد پیش کی۔ پروفیسرڈاکٹر محمد سلیم نے کہاکہ طلبائوطالبات اپنی تعلیم کوانسانیت کی خدمت کے لئے استعمال کریں۔پروفیسر ڈاکٹرسید عاطف رضا نے کہا کہ پنجاب یونیورسٹی کالج آف فارمیسی دنیاکے ٹاپ 350 فارمیسی اداروں میں شامل ہے۔ انہوں نے کہا کہ پنجاب یونیورسٹی کالج آف فارمیسی میں مختلف ممالک سے طلباء تعلیم حاصل کرنے آتے ہیں۔انہوں نے کہا کہ کالج میں اساتذہ کا ریسرچ امپیکٹ فیکٹر60سے زائد ہے۔ انہوں نے کہا کہ ہمارے گریجوایٹس کی مارکیٹ میں بہت ڈیمانڈ ہے۔ بعد ازاں طلبائوطالبات میں ڈگریاںو میڈلز تقسیم کئے گئے۔