Live Updates

عمران خان نے خیبرپختونخواہ حکومت کو مائنز اینڈ منرلز بل پیش کرنے سے روک دیا

جب تک میں خود باہر آ کر نہیں دیکھتا، مائنز اینڈ منرلز بل اسمبلی میں پیش نہیں ہو گا، بانی تحریک انصاف

محمد علی منگل 6 مئی 2025 21:34

راولپنڈی (اردوپوائنٹ اخبارتازہ ترین۔ 06 مئی ۔2025 ) عمران خان نے خیبرپختونخواہ حکومت کو مائنز اینڈ منرلز بل پیش کرنے سے روک دیا۔ تفصیلات کے مطابق منگل کے روز اڈیالہ میں بانی تحریک انصاف عمران خان سے ان کی بہنوں کی ہونے والی ملاقات کے بعد میڈیا سے گفتگو کرتے ہوئے علیمہ خانم نے کہا کہ عمران خان نے پیغام دیا ہے کہ جب تک میں خود باہر آ کر نہیں دیکھتا، مائنز اینڈ منرلز بل اسمبلی میں پیش نہیں ہو گا۔

بانی تحریک انصاف نے یہ بھی کہا کہ علی امین ملاقات کیلئے کیوں نہیں آ رہے؟ انہوں نے سختی سے منع کر دیا ہے میرے سے ملے بغیر کوئی میٹنگ اٹینڈ نہیں کرے گا۔ بانی نے ہدایت کی ہے کوئی پالیسی ان کے بغیر منظور نہیں ہوگی، کوئی اپیکس کمیٹی میں اجازت کے بغیر نہیں جائےگا۔بانی پی ٹی آئی نے جنیداکبر کو ہدایت کی ہے کہ سارا فوکس تحریک پر رکھیں، لوگ اس وقت بھرپور تحریک چاہتے ہیں۔

(جاری ہے)

علیمہ خان نے مزید کہا کہ یہ جو مودی کے دوست ہم پر مسلط ہیں، اِن کے لیے عمران خان سب سے بڑا دشمن ہے۔ ایک عمران خان نے اِنہیں خوفزدہ کیا ہوا ہے، یہ مودی سے نہیں، بلکہ عمران خان سے ڈر رہے ہیں۔ واضح رہے کہ کئی ہفتوں بعد عمران خان کی بہنوں کو اڈیالہ جیل میں اپنے بھائی سے ملاقات کی اجازت دی گئی۔ ملاقات سے قبل اڈیالہ جیل کے قریب کشیدہ صورتحال بھی رہی، پی ٹی آئی کے کئی رہنماوں کو پولیس کی جانب سے تشدد کا نشانہ بنایا گیا۔

جبکہ بعد ازاں عمران خان کی دو بہنوں نورین نیازی اور عظمیٰ خان کو ملاقات کی اجازت دے دی گئی۔ علیمہ خان کو آج بھی عمران خان سے ملاقات نہیں کرنے دیا گیا۔ نورین نیازی اور عظمیٰ خان کی جانب سے عمران خان سے ملاقات کرنے کے بعد علیمہ خان نے ملاقات کی تفصیلات سے مڈیا کو آگاہ کیا۔