Live Updates

پی ایس ایل، سیکورٹی انتظامات مکمل،چھ ہزارپولیس افسران و اہلکاروں کی تعیناتی

بدھ 7 مئی 2025 18:20

راولپنڈی (اُردو پوائنٹ اخبارتازہ ترین - اے پی پی۔ 07 مئی2025ء) پاکستان سپر لیگ سیزن 10 کے موقع پر راولپنڈی پولیس نے فول پروف سیکورٹی و ٹریفک انتظامات مکمل کرتے ہوئے چھ ہزار پولیس افسران و اہلکاروں کو تعینات کردیا ہے ۔پولیس ترجمان کے مطابق راولپنڈی پولیس کے6000 افسران و اہلکار فرائض سرانجام دیں گے، ٹریفک کی روانی کو برقرار رکھنے کے لئے ٹریفک پولیس کے 367 افسران فرائض سرانجام دیں گے،تمام تر انتظامات کی سی سی ٹی وی کیمروں سے مانیٹرنگ کی جائے گی جس کے لئے خصوصی کنٹرول روم قائم کیا گیا ہے۔

سٹیڈیم کے گردونواح میں ایلیٹ فورس، ڈولفن فورس اور تھانوں کی موبائلز گشت کے فرائض سرانجام دیں گی۔ٹیموں کے روٹ کی موثر سیکورٹی کے ساتھ ساتھ چھتوں پر سنائپرز تعینات کئے گئے ہیں۔

(جاری ہے)

میچ دیکھنے کے لئے آنے والے شائقین کرکٹ کو واک تھرو گیٹ اور مکمل باڈی سرچنگ کے بعد سٹیڈیم میں داخلے کی اجازت دی جائے گی۔ پاور بینک، ہینڈ فری، ائیر پوڈز، کھانے پینے کی اشیاء سمیت کوئی ممنوعہ شے ساتھ لے جانے کی اجازت نہیں ہے۔

تمام سینئر افسران فیلڈ میں موجود رہ کر ڈیوٹی پر مامور افسران کو چیک اور بریف کریں گے۔میچز کے دوران سیکورٹی انتظامات کے ساتھ ساتھ ٹریفک کی بلاتعطل روانی کو یقینی بنایاجائے گا۔پاک فوج، رینجرز، دیگر سیکورٹی اداروں اور ضلعی انتظامیہ کے ربط سے فول پروف سیکورٹی انتظامات کویقینی بنایا جائے گا۔سی پی او سید خالد ہمدانی کا کہنا تھاکہ پاکستان سپر لیگ میچز کے دوران شہریوں کو پر سہولت اور خوشگوار ماحول کی فراہمی کے لئے ہر ممکن اقدامات کو یقینی بنایا جارہا ہے۔